मलेसियाले पीएनजीलाई दियो १९७ रनको लक्ष्य

काठमाडौं- कीर्तिपुर मैदानमा जारी त्रिदेशीय टी २० सिरिजमा मलेसियाले पपुवा न्युगिनीलाई १९७ रनको लक्ष्य प्रस्तुत गरेको छ। टस हारेर ब्याटिङको निम्तो पाएको मलेसियाले पुरा ओभर खेल्दै छ विकेट गुमाएर १९६ रन बनाउँदै १९७ रनको लक्ष्य प्रस्तुत गरेको हो।

मलेसियाका लागि कप्तान अहमद फैजले ६३ रन बनाए भने सियद अजिजले सर्वाधिक ६४ रन बनाए। त्यस्तै, जुबाइदी जुल्किफलीले २२ बलमा ४६ रनको योगदान दिए।

पीएनजीविरुद्ध आक्रामक देखिएको मलेसियाका अजिजले ३५ बलमा आठ चौका र तीन छक्का प्रहार गरेका थिए। यता पीएनजीका सबै खेलाडीले धेरै रन खर्चिए। सबैभन्दा धेरै रन खर्चिनेमा कप्तान आशाद भाला नै रहे। यता बलर काबुवा मोरियाले भने तीन ओभर बलिङ गर्दै चार विकेट गिराए। चाड सुपर र रिलेय हेकुरेले पनि समान १-१ विकेट लिए।