दुई दिने 'ई-प्लानेट नेसनल कप फुटसल' बिहीबारबाट

काठमाडौं- नेसनल कलेजको आयोजनामा दोस्रो ई-प्लानेट अन्तर कलेज फुटसल प्रतियोगिता आयोजना हुने भएको छ । आउदो बिहीबार र शुक्रबार बालुवाटारस्थित ढुकु फुटसल हबमा आयोजना हुने प्रतियोगितामा देशभरका ३२ वटा कलेजले सहभागिता जनाउने आयोजकले जनाएको छ । 

मुख्य प्रायोजक एजुकेसन प्लानेट (ई-प्लानेट) प्रालि तथा सह-प्रायोजक नेपाल एसबीआई बैंक रहेको प्रतियोगितामा प्लस टु र ब्याचलर लेभलका विद्यार्थीले सहभागीता जनाउनेछन् । सहभागी टोलीलाई ८ समूहमा विभाजन गरि समूह चरणका खेल राउन्ड रोविनको आधारमा र त्यसपछिका खेल नकआउट हुने आयोजकले जनाएको छ ।

दुईदिने यो प्रतियोगिताको विजेताले टोलीले ३५ हजार नगद सहित कूल ५० हजार रुपैयाँ बराबरको पुरस्कार तथा दोस्रो हुनेले २० हजार नगद सहित कूल ३० हजार रुपैयाँ बराबरको पुरस्कार प्राप्त गर्नेछन् । 

यसका साथै प्रतियोगितामा उत्कृष्ट प्रदर्शन गर्ने एक खेलाडी, उच्च गोलकर्ता तथा उत्कृष्ट गोलकिपरले पनि आकर्षक गिफ्ट ह्याम्पर प्राप्त गर्नेछन् । प्रतियोगीतामा सहभागी हुने टिमले ६ हजार रूपैयाँ रजिस्ट्रेसन शुल्क बुझाउनुपर्ने जानकारी दिए ।