नेपालले पहिलो खेल एमसीसीसँग ६ ओभर र दोस्रो खेल नेदरल्याण्ड्ससँग २० ओभरको खेल्ने

काठमाडौं : आइतबारका लागि तय भएको नेपाल, नेदरल्याण्ड्स र मेरिलेबोन क्रिकेट क्लब (एमसीसी) बीचको त्रिकोणात्मक टी-ट्वान्टी श्रृखंला वर्षाका कारण लर्डसमा प्रभावित बनेको छ । 

वर्षाले खेलहरु समयमै सुरु हुन नसक्दा एमसीसीले खेल तालिकामा हेरफेर गरेको छ । अबको खेलतालीका अनुसार एमसीसीले नेदरल्याण्ड्ससँग हुने पहिलो खेल र लगत्तै नेपालसँग खेल्ने खेललाई ६–६ ओभरमा छोट्याएको छ ।
 
तर, टी–२० अन्तराष्ट्रियको मान्यता प्राप्त अन्तिम नेपाल र नेदरल्याण्ड्सबीचको खेल भने पूरै २० ओभरको हुने एमसीसीले जनाएको छ । यसअघि बिहानै देखि परेको वर्षा केहीबेर अघि रोकिएपछि एमसीसीले खेल तालिका हेरफेर गरेको थियो । नयाँ खेल तालिका अनुसार अहिले एमसीसी र नेदरल्याण्ड्सबिचको खेल सुरु भएको छ ।

एमसीसीले टस जितेर पहिले ब्याटिङ् गर्ने निर्णय गरेको छ ।

आईसीसीबाट एकदिवसीय मान्यता पाएपछि नेपालले अन्तर्राष्ट्रिय श्रृंखला खेल्न लागेको यो पहिलोपटक हो । नेपाल र नेदरल्याण्डबीचको यो मैत्रीपूर्ण खेललाई आईसीसीले अन्तर्राष्ट्रिय टी-२० को मान्यता दिएको छ ।