'अब झोले खेदकुद संघ खारेज हुन्छ'

काठमाडौं-राष्ट्रिय खेलकूद परिषदका सदस्य सचिव केशवकुमार विष्टले खेलकूद संघको नाममा विदेश जाने उद्धेश्यले खोलेका, सम्पर्क कार्यालय नभएका र काम नगर्ने झोले खेलकूद संघलाई क्रमशः खारेज गरिँदै लगिएको र भविष्यमा पनि यसलाई निरन्तरता दिने बताएका छन् ।

सम्वन्धित खेलको विकास गर्दै खेलाडी उत्पादन गर्ने उद्धेश्य राखी सञ्चालन गर्नुपर्ने खेलकूद संघ नाम मात्रैको संस्था खोलेर काम नगरेकै कारण आफु सदस्य सचिव भएर आएको ३ वर्षको अवधिमा २५ वटा त्यस्ता संस्था खारेज गरिसकेको पनि सदस्य सचिव विष्टले बताए ।

टग अफ वार एशोसियसन (तान डोरी संघ) काठमाडौंको आयोजनामा विभिन्न विद्यालयका प्रिन्सिपलहरुको लागि राजधानीको मध्यबानेश्वरमा आयोजित एकदिने 'खेलकूद विज्ञान तथा प्राविधिक गोष्ठी' को उद्घाटनका अवसरमा सदस्य सचिव विष्टले सो कुरा बताएका हुन ।

हालसम्म अन्तराष्ट्रिय खेलकूद प्रतियोगितामा पुरुषको तुलनामा महिला खेलाडीले बढी पदक जितेको उल्लेख गर्दै सदस्य सचिव विष्टले पुरुषको साथै महिला खेलाडी उत्पादन गर्ने र नियमितरुपमा प्रतियोगिता आयोजना गर्ने कार्यमा संघ सकृय भएमा परिषदले आर्थिक अनुदानदेखि राष्ट्रिय तथा अन्तराष्ट्रिय तालीममा प्रशिक्षक सहभागी गराउन परिषदले कुनै कसर बाँकी नराख्ने पनि उनले बताए ।

सरकारले विरामीको उपचारका लागि अस्पताल खोल्नुभन्दा रंगशाला बनाएर स्वस्थ र निरोगी खेलाडी उत्पादन गर्नुपर्ने पनि विष्टले औंल्याए ।    एशियाली टग अफ वार एशोसियसनका उपाध्यक्ष भवानीप्रसाद पौडेलले खेलकोे विकासको लागि समयसमयमा विभिन्न प्रतियोगिता आयोजना गरि खेलाडी उत्पादन गर्दै खेललाई जीवन्त राख्नुपर्ने कुरामा जोड दिए