इजिप्टलाई हराउँदै सेनेगलले बनायो विश्वकपमा स्थान

काठमाडौं- दुई खेलको समग्रमा नतिजा १-१ को बराबरी भएपछि इजिप्टविरुद्ध पेनाल्टीमा जित निकाल्दै सेनेगलले कतार विश्वकपको यात्रा तय गरेको छ। मंगलबार रातिको खेलमा सेनेगलले खेलको चौथो मिनेटमा एक गोलको अग्रता बनाएको थियो।

त्यो समयमा इजिप्टका हाम्दी फाथीले आफ्नै पोस्टमा गोल गरेपछि सेनेगलले दोस्रो लेगको खेलमा अग्रता बनाएको थियो। तर त्यसपछि दुवै टिमले गोल गर्न सकेनन्।

यसअघि  गएको शुक्रबार भएको पहिलो लेगको खेलमा इजिप्टले गोल गरेको थियो। त्यो सामयमा पनि खेलको चौथो मिनेटमै सेनेगलका सलिओउ सिसले आत्मघाति गोल गरेपछि इजिप्टले जित निकालेको थियो।

दुई खेलको छनोटअन्तर्गत पहिलो खेलमा इजिप्टले एक गोल र दोस्रो खेलमा सेनेगलले एक गोल गरेपछि खेल १-१ को बराबरी भएको थियो।

सेनेगलले इजिप्टलाई पेनाल्टीमा ३-१ ले हरायो। पेनाल्टीमा इजिप्टका ३ खेलाडीले गोल गर्न सकेनन। त्यस्तै, सेनेगलका पनि २ खेलाडीले पेनाल्टीमा गोल गर्न सकेनन्।

बाँकी खेलाडीले गोल गरेसँगै सेनेगलले ३-१ को जित निश्चित गरेको हो।