पोर्चुगललाई विश्वकपमा पुर्‍याउन ब्रुनो फर्नान्डेसको दुई गोल

काठमाडौं- ब्रुनो फर्नान्डेसको दोहोरो गोलको सहयोगमा पोर्चुगलले कतार विश्वकपको यात्रा तय गरेको छ। मंगलबार राति पोर्चुगलको  पोर्टोमा आयोजना भएको प्लेअफको फाइनल खेलमा नर्थ म्यासेडोनियाँविरुद्ध जित निकाल्दै पोर्चुगलले विश्वकपमा स्थान बनाएको हो।

यसअघि जर्मनी र इटालीलाई हराइसकेको म्यासेडोनिया गएरातिको खेलमा पनि जितको लक्ष्यका साथ मैदान पसेको थियो। तर पोर्चुगलको घरेलु समर्थकमाझ खेल अवधिभर ३६ प्रतिशत बल पोसेसन बनाउँदै विपक्षीको पोस्टमा तीन पटक मात्र आक्रमण गर्न सफल भयो।

यता म्यासेडोनियाको पोस्टमा ११ पटक प्रहार गरेको पोर्चुगलले दुई गोल गरेको हो। पोर्चुगलका लागि दुवै गोल ब्रुनोले नै गरे। खेलको ३१औं मिनेटमा रोनाल्डोबाट पाएको पासको सदुपयोग गर्दै ब्रुनोले पोर्चुगललाई अग्रता दिलाएका थिए।

त्यस्तै, उनले दोस्रो गोल खेलको ६६औं मिनेटमा गरे। त्यतिबेला उनलाई डिएगो जोटाले पास उपलब्ध गराएका थिए।