नेपाल-पीएनजी-मलेसिया सम्मिलित त्रिकोणात्मक टी-२० सिरिज आजबाट

काठमाडौं- काठमाडौंमा आजबाट नेपाल, मलेसिया र पपुवा न्युगिनी (पीएनजी) को त्रिकोणात्मक टी-२० सिरिज सुरु हुँदैछ। कीर्तिपुरको टियू मैदानमा हुने सिरिजको पहिलो खेलमा नेपालले पपुवा न्युगिनीको सामना गर्न लागेको हो।

यसअघि नेपाली टिमले पीएनजीसँग दुई खेलको एकदिवसीय सिरिज खेलेको थियो। त्यो सिरिजमा पीएनजीले क्लिन स्विप गरेको थियो। त्यससँगै उसले सिरिजको उपाधि जितेको हो।

लिग दुई का दुवै खेलमा जित निकालेको नेपालले घरेलु सिरिजमा भने हार बेहोरेको हो। तर, आजको टी २० खेलमा जितको लक्ष्यका साथ नेपाल मैदान उत्रँदैछ।

यसअघि गएको बैसाखमा सम्पन्न टी-२० सिरिजमा नेपालले उपाधि जितेको थियो। सो सिरिजको फाइनलमा नेपालले नेदरल्यान्डलाई हराएर उपाधि जितेको थियो। तर त्यसपछि नेपाल बरियताको ११औं स्थानमा पुगेको थियो। तर पछिल्लो टी-२० विश्वकपको ग्लोबल छनोटमा हार बेहोरेपछि नेपालको बरियता दुई हप्तामै दुई स्थान खस्किएको थियो। अहिले नेपाल टी २० वरियताको १३औं स्थानमा छ। पीएनजी १९औं स्थानमा छ भने मलेसिया ३३औं स्थानमा छ।