नेपाल, नेदरल्याण्ड्स र एमसीसीको त्रिकोणात्मक क्रिकेट शृंखला आज

काठमाडाैं- नेपालले आइतबार नेदरल्याण्ड्स र इंग्ल्याण्डको मेरिलेबोन क्रिकेट क्लब (एमसीसी) सँग त्रिकोणात्मक ट्वेण्टी–ट्वेण्टी क्रिकेट खेल्दैछ । मैत्रीपूर्ण भए पनि अन्तर्राष्ट्रिय क्रिकेट परिषद आईसीसीले मान्यता दिएकोले याे खेललाई  महत्वपूर्ण मानिएको छ । 

नेपालले पहिलो खेल एमसीसीसँगको खेल्ने छ । उक्त खेल नेपाली समय अनुसार बेलुका ६ बजेपछि शुरु हुनेछ । त्यस्तै, नेदरल्याण्ड्ससँगको अर्को खेल नेपालले नेपाली समय अनुसार राति १० बजेपछि खेल्नेछ । 

पहिलो खेल दिउँसो पौने ३ बजे नेदरल्याण्ड्स र एमसीसीबिच हुनेछ । नेपालका कप्तान पारस खड्काले नेपाली टीमका लागि आजको खेल महत्वपूर्ण अवसर भएको प्रतिक्रिया दिएका छन् । 

३ वर्षपछि नेपाली टोली आईसीसीले मान्यता दिएको ट्वेण्टी ट्वेण्टी क्रिकेट खेल्न लागेकाले नेपालका लागि आजको खेल महत्वपूर्ण र इतिहास बनाउने अवसर भएको कप्तान खड्काको भनाइ छ । 

एक हप्ताअघि इंग्ल्याण्ड पुगेको नेपाली टोलीले त्यहाँका स्थानीय क्लवहरुसँग दुई एकदिवसीय र दुई ट्वेण्टी ट्वेण्टी ढाँचाका अभ्यास खेल खेलेको थियो । जसमध्ये तीन खेलमा जित हासिल गरेको नेपाल १ खेलमा पराजित भएको थियो । 

त्रिकोणात्मक शृँखलापछि नेपाली टोली नेदरल्याण्ड्स प्रस्थान गर्नेछ । जहाँ नेपालले आगामी बुधबार र शुक्रबार नेदरल्याण्ड्ससँग एतिहासिक एकदिवसीय शृंखला खेल्नेछ । एकदिवसीय मान्यता पाएपछि पहिलो पटक नेपालले शृंखला खेल्न लागेको हो ।