नेपाली फुटबलको जसी र एन्फाको लोगो फेरिने : राम्रो डिजाइन गर्नेलाई ५० हजार

काठमाडौं-अखिल नेपाल फुटबल संघ (एन्फा) को लोगो फेरिने भएको छ । खुल्ला प्रतिस्पर्धातका आधारमा एन्फाले लोगा डिजाइन गरिने एन्फाले जनाएको छ । 

यससँगै नेपाली राष्ट्रिय टोलीको जर्सीको डिजाइन पनि फेरिने बताएको छ । वैशाख २२ गते कर्मा छिरिङ शर्पाको नेतृत्वमा एन्फामा आएको नयाँ नेतृत्वसँगै एन्फाको लोगो र जर्सी परिवर्तन गर्न लागिएको हो । 

अब नयाँ डिजाइन गरेको लोगो र जर्सीले, नेपाल र नेपाली फुटबललाई झल्को दिने, अन्तराष्ट्रिय स्तर र उच्च गुणस्तरीय हुनुपर्ने बताएका छन् । 

यस्तै लोगो र जर्सीमा चार भन्दा बढी रङ हुनु नहुने तथा वाटरमार्क हुन नहुने उल्लेख छ । लोगो र जर्सी डिजाइनको लागि १० दिनको समय तोकिएको छ ।

यसअघि एन्फाको लोगोमा नेपालको नक्सासहित सगरमाथामा नेपालको दुईवटा राष्ट्रिय झन्डाभित्र फुटबलसहितको लोगो चल्तीमा थियो ।

राष्ट्रिय टिमले लगाउने रातो र निलो जर्सीमा नेपालको राष्ट्रिय झन्डा राखिएको थियो । एन्फाको पछिल्लो लोगो २०६२/६३ को आन्दोलनपछि परिवर्तन गरिएको थियो । 

लोगो र जर्सी डिजाइनको प्रतिस्पर्धा शनिबारबाट खुला गरिएको छ । खुल्ला प्रतिस्पर्धामार्फत उत्कृष्ट मानिने लोगो र जर्सीको डिजाइन गर्नेलाई ५० हजार रुपैया पुरस्कारको समेत व्यवस्था गरेको एन्फाले जनाएको छ ।