पपुवा न्युगिनीलाई हरायो नेपालले

काठमाडौं– आईसीसी विश्वकप क्रिकेट लिग–२ अन्तर्गत पपुवा न्युगिनी (पीएनजी) सँगको एकदिवसीय अन्तर्राष्ट्रिय क्रिकेटमा नेपाल सात विकेटले विजयी भएको छ। दुबई अन्तर्राष्ट्रिय क्रिकेट मैदानमा पीएनजीले दिएको १८४ रनको लक्ष्य नेपालले ३६ ओभर ५ बलमा तीन विकेट गुमाएर भेट्टायो। 

नेपालका लागि आरिफ शेखले सर्वाधिक ५९ रन बनाए। यस्तै कुशल भुर्तेलले ५०, रोहित पौडेलले ४४, आशिफ शेखले दुई रन बनाउँदा दीपेन्द्रसिंह ऐरी शून्य रनमा आउट भए। बलिङतर्फ पीएनजीका चार्ल्स अमिनीले दुई र कबुवा मोरेले एक विकेट लिए। 

यसअघि टस हारेर पहिले ब्याटिङ गरेको पीएनजीले निर्धारित ५० ओभरमा आठ विकेट गुमाएर १८३ रन बनाएको थियो। पीएनजीका लागि कप्तान असाद भालाले सर्वाधिक ४५ रन बनाए। बलिङतर्फ नेपालका सन्दीप लामिछाने र सोमपाल कामीले दुई–दुई तथा करण केसी, आरिफ शेख, दीपेन्द्रसिंह ऐरी र पवन सर्राफले एक–एक विकेट लिए।

यो शृङ्खलामा नेपालले पहिलो खेलमा पीएनजीलाई हराएको थियो भने यूएईसँग दुवै खेलमा पराजित भएको थियो। विश्व क्रिकेट लिग–२ मा १२ खेलमा १२ अंकसहित नेपाल छैटौं स्थानमा छ। यूएई दोस्रो र पीएनजी पुछारमा रहेको छ।