स्पेसल स्पोर्टस अवार्ड अजय राणालाई

काठमाडौं– डाक्टर अजय राणाले एनएसजेएफ स्पोर्टस अवार्डमा स्पेसल विधाको अवार्ड जितेका छन्। खेलाडीको उपचारमा संलग्न रहेका अजयले यो वर्ष स्पेसल अवार्ड हात परेका हुन्।

उनी डाक्टरीमा लाग्नुअघि संकटा र बोइज युनियनबाट फुटबल खेलेका थिए। उनी हक्कीमा पनि खेलाडी बने। तर एमबीबीएसमा उनले नाम निकालेपछि उनले खेल छोडे। पछि फेरि खेलकुदसँगै जोडिए।

उनी खेलाडीको उपचारमा संलग्न भए। उनले दक्षिण एसियाली खेलकुदमा नेपाली खेलाडीको स्वास्थ्य टिमको लिड गरिसकेका छन्। राणा नेपाली खेलकुदको स्वास्थ्यका पर्याय नै बनेका छन्। राष्ट्रिय टिममा रहेका हरेक खेलाडीको उपचारमा उनी प्रत्यक्ष वा अप्रत्यक्ष रुपमा सम्मिलित भएका छन्।

नेपाल खेलकुद पत्रकार मञ्चले उनलाई स्पेसल अवार्डबाट सम्मानित गरेको हो। अजयका छोरा जयन्त शमसेर राणाले उनको अवार्ड लिएका छन्। जयन्तले यो सम्मान पाउनु धेरै खुसीको कुरा भएको बताए। पिताको यो अवार्डले आफूलाई पनि धेरै खुसी दिलाएको बताएका छन्।