कम्युनिस्टको दोधारे चरित्रको पछि नलाग्नुहोस् : कांग्रेस नेता सिंह

काठमाडौं- नेपाली कांग्रेसका नेता प्रकाश मान सिंहले जुन सुकै छिमेकी मुलुकले राष्ट्र र जनताको हितमा दिने सहयोग लिन सकिने बताएका छन्। कांग्रेसले देश र जनताको हित विपरीतका सहयोग अस्वीकार गर्ने प्रस्ट पार्दै नेता सिंहले जनताको हितलाई ध्यानमा राखेर एमसीसी जस्ता परियोजना स्विकार्न सकिने बताए।

'एमसीसीका बारेमा फैलाइएको नकारात्मक हल्लाको पछि लाग्नु हुँदैन। कांग्रेस देश र जनताको सवालमा गम्भीर पार्टी हो,' नेपाली कांग्रेस काठमाडौं क्षेत्र नम्बर १ ले आइतबार बुद्धनगरमा घर घर जाऔं कांग्रेस जिताऔं अभियानअन्तगर आयोजित कार्यक्रममा बोल्दै उनले भने।

कम्युनिस्ट पार्टीका दोधारे कुराले नागरिकमा गलत सन्देश गएकाले नेता सिंहको दाबी छ। उनले कम्युनिस्टहरूमा जनता सामु एउटा र अन्तर्राष्ट्रिय स्तरमा अर्कै कुरा गर्ने चरित्र रहेको बताएका छन्।

चुनाव नजिक आइसकेकाले सबै जनताले कम्युनिस्ट चरित्रको बारेमा प्रस्ट हुनुपर्ने उनको भनाइ छ। उनले कांग्रेसले कम्युनिस्ट चरित्रबारे जनतालाई बुझाउन सक्नुपर्ने बताए।