पार्टीको नवनिर्मित भवन उद्घाटनका लागि सिन्धुली जाँदै प्रचण्ड

काठमाडौं- नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल ‘प्रचण्ड’ आज सिन्धुली जाने भएका छन्। 

नेकपा माओवादी केन्द्र सिन्धुलीको नवनिर्मित पार्टी कार्यालय भवनको उद्घाटन गर्न उनी सिन्धुली जान लागेका हुन्। उनले सोही क्रममा एक विद्यालयको भवन उद्घाटन गर्ने छन्। सोही कार्यक्रमका लागि शिक्षामन्त्री देवेन्द्र पौडेल पनि सिन्धुली प्रस्थान गर्ने भएका छन्।

कमलामाई नगरपालिका–४ ढुङ्ग्रेवास दोभानटारमा रहेको सिन्धुली विद्याश्रम सार्वजनिक शैक्षिक गुठीको नवनिर्मित दुई वटा विद्यालय भवन उद्घाटनका लागि प्रचण्ड आज दिउँसो १ बजे सिन्धुली पुग्ने कार्यक्रम रहेको माओवादीले जनाएको छ।

अपरान्ह ४ बजेपछि सिन्धुली उद्योग बाणिज्य संघका नवनिर्वाचित पदाधिकारीसहित जिल्लाका उद्योगी व्यवसायीसँग प्रचण्डले भेटघाट तथा छलफल गर्ने कार्यक्रम रहेको छ। 

अध्यक्ष प्रचण्ड र शिक्षामन्त्री पौडेलले आज नै कमलामाई नगरपालिका –६ नुनथलामा रहेको सिन्धुली सामुदायिक टेक्निकल इन्स्टिच्युटको पनि अवलोकन गर्ने कार्यक्रम रहेको छ। अध्यक्ष प्रचण्ड आज बेलुका सिन्धुलीमाढी नै बस्नेछन्।

अध्यक्ष प्रचण्डले भोलि नेकपा माओवादी केन्द्र सिन्धुलीको नवनिर्मित पार्टी कार्यालय भवनको उद्घाटन गर्ने कार्यक्रम रहेको छ।