पीएनजीले नेपाललाई दियो २०५ रनको लक्ष्य

काठमाडौं– यूएईमा जारी आईसीसी विश्वकप लिग २ अन्तर्गत आज जारी खेलमा नेपालले २०५ रनको लक्ष्य पाएको छ। युनाइटेड अरब इमिरेट्समा जारी खेलमा नेपालले पीएनजीसँग २०५ रनको लक्ष्य पाएको हो।

टस जितेर ब्याटिङ राजेको पीएनजीले पूरा ओभर खेल्दै आठ विकेट गुमाएर २०४ रन बनाएको हो। पीएनजीका लागि चौथो नम्बरमा मैदान छिरेका चार्ल्स अमिनीले सर्वाधिक ५९ रन बनाए।

पपुवा न्युगिनीविरुद्ध नेपाली बलरले सुरुमा औसत बलिङ गरेका थिए। तेस्रो ओभरमै सोमपाल कामीले ११ रन खर्चिँदा नेपाली बलिङ खस्किएको देखिएको थियो। तर, त्यसपछिका ओभरमा सामपाल र करणले सम्हालेर लिएर गए।

तर पहिलो विकेट लिन नेपालले १० औं ओभर नै पर्खिनुपर्यो। बलर आरिफ शेखले टोनी उरालाई पेवेलियन पठाउँदै नेपालका लागि पहिलो विकेट लिए। उराले ३४ बलमा २७ रन प्रहार गरेर मैदान छोडेका थिए।

त्यस्तै, नेपालले १३ औं ओभरमा दोस्रो विकेट लियो। कप्तान सन्दीप लामिछानेले २५ रन बनाइसकेका लेगा सिआकाको विकेट गिराएपछि नेपाली टिम केहि सहज अवस्थामा पुगेको थियो।

तेस्रो नम्बरमा मैदानमा पसेका कप्तान अस्साद वालाले १९ रन बनाए भने चाल्र्स अमिनीले ५९रन जोडे रन बनाए। वालालाई ज्ञानेन्द्र मल्लले आउट गराए भने अमिनीलाई सोपमालले पेवेलियन फर्काए। एक दिवसीय क्रिकेटमा ज्ञानेन्द्रको यो पहिलो विकेट समेत हो। त्यस्तै, चाड सुपरले पनि ३५ रनको योगदान दिए। १२ बल खेलेका नोर्मन वनुआले भने २३ रन बनाए।

नेपालका लागि आरिफ शेखले एक विकेट गिराउँदै किफायति बलिङ गरे। उनले ६ ओभर बलिङ गर्दै १६ रन खर्चिए। कप्तान सन्दिप लामिछानेले पनि १० ओभरमा एक विकेट लिएर ३० रन खर्चिँदा सोमपाल कामीले तीन विकेट लिए। सोमपालले तीन विकेट गिराए।

सन्दिपको कप्तानीमा नेपाली टिमले खेलेको यो पहिलो एक दिवसीय क्रिकेट हो। यसअघि ओमनमा भएको प्रतियोगितामा नेपालले ज्ञानेन्द्र मल्लको कप्तानीमा खेलेको थियो।

आजको खेलबाट नेपालका भीम सार्की, विवेक यादव र सागर ढकालले एक दिवसीय क्रिकेटमा डेब्यू गरेका छन्। त्यस्तै, पपुवा न्युगिनियाका सोमो कमियले पनि एकदिवसीयमा डेब्यु गरेका हुन्।