उखुबारी हत्याकाण्डका सबै आरोपित पुर्पक्षका लागि जेल चलान

काठमाडौं– तीन जना व्यावसायिक साझेदारको हत्या गरी गाडिएको घटनाका ५ जना आरोपितलाई अदालतले पुर्पक्षका लागि कारागार चलान गर्ने आदेश दिएको छ।

मोरङ जिल्ला अदालतले थुनछेकको बहसपछि बुधबार उक्त आदेश गरेको हो। मोरङमा २ र ललितपुरमा एक जनालाई मारेर गाडिएको अवस्थामा शव फेला परेको थियो।

मोरङको धनपालन गाउँपालिका–७ उखुबारीमा सुनसरीको धरान स्थायी घर भई भक्तपुर बस्दै आएका ४८ वर्षीय राजेन्द्रकुमार श्रेष्ठ र सप्तरीको शम्भुनाथ गाउँपालिका स्थायी घर भई काठमाडौं बस्दै आएका ३२ वर्षीय शम्भुकुमार चौधरीको शव फेला परेको थियो।

त्यसैगरी ललितपुरको गोदावारी नगरपालिका–१२ थेचोमा ६३ वर्षीय मोहनकुमार लिम्बूको शव फेला परेको थियो। तीनै जना व्यावसायिक साझेदार रहेको अनुसन्धानबाट खुलेको छ। 

सिरहाको सिराहा नगरपालिका–२१ स्थायी घर भई काठमाडौंको बल्खुमा बस्दै आएका ३२ वर्षीय अनिलकुमार मण्डलको योजनामा तीनैजनाको हत्या भएको निष्कर्ष प्रहरी अनुसन्धानले निकालेको छ। घटनामा संलग्न भएको आरोपमा प्रहरीले मण्डलसहित मोरङको जहदा गाउँपालिका–४ सिसवनीका २९ वर्षीय अमित साह भनिने दिनानाथ सोनार र धनपालथान–७ कमलपुर पश्चिम टोलका ६२ वर्षीय नासिर आलमलाई पनि पक्राउ गरेको थियो।