सुदूरपश्चिममा बन्दको प्रभाव : लामो दुरीका सवारी ठप्प

धनगढी- सुदूरपश्चिम प्रदेशमा ६ कम्युनिस्ट पार्टी र २ वटा मोर्चाले आह्वान गरेको नेपाल बन्दको प्रभाव देखिएको छ। सुदूरपश्चिममा यातायात, विद्यालय लगायत क्षेत्र प्रभावित हुन पुगेको छ।

सोमबार बिहानैबाट अटो, मोटरसाइकलबाहेक लामो दुरीका सवारी साधन चल्न सकेका छैनन्। जिल्ला प्रहरी कार्यालय कैलालीका प्रवक्ता प्रहरी नायब उपरीक्षक वेदप्रकाश जोशीले बन्दका कारण लामो दुरीका सवारी प्रभावित बनेको बताए।

बन्दमा अस्पताल, एम्बुलेन्स, खानेपानी, तरकारी, दुग्धजन्य पदार्थ, दमकललगायत अत्यावश्यक सेवा भने खुल्ला रहने बताइएको छ।

विप्लव नेतृत्वको नेकपा, मोहन विक्रम सिंह नेतृत्वको नेकपा मसाल, मोहन वैद्य नेतृत्वको नेकपा क्रान्तिकारी माओवादी, चित्रबहादुर केसी नेतृत्वको राष्ट्रिय जनमोर्चा, सिपी गजुरेल नेतृत्वको देशभक्त जनगणतान्त्रिक मोर्चा, ऋषि कट्टेल नेतृत्वको नेकपा लगायतले एमसीसीको विरोधमा आज नेपाल बन्दको आह्वान गरेका हुन्।