दृष्टिविहीन अमिटले गरे पुनः सगरमाथा आरोहणको तयारी

बागलुङ- बागलुङका न्यून दृष्टि भएका अमिट केसीले आगामी चैतमा पुनः सगरमाथा आरोहण गर्ने भएका छन्। १ वर्षअघि सगरमाथाको ८ हजार मिटर उचाइमा पुगेर फर्किएका उनले चैतमा पुनः सगरमाथा आरोहण गर्ने तयारी थालेका छन्।

आइतवार बागलुङमा पत्रकार सम्मेलन गर्दै केसीले सगरमाथाको चुचुरो चुम्ने आफ्नो लक्ष्य कायम रहेको जानकारी दिए। जैमिनी नगरपालिका–४ सर्कुवाका केसीले सगरमाथा आरोहणको सम्पूर्ण तयारी पूरा भए पनि आर्थिक अभाव परेकाले सहयोगी मनलाई सहयोग गरिदिन आग्रह समेत गरेका छन्।

‘अघिल्लो पटक हावाहुरीका कारण बीचमा १ दिन रोकिन नपरेको भए म चुचुरोमा पुग्थें, अक्सिजन लिएर ४८ घण्टा बस्नुपर्ने, थप अक्सिजन लिने पैसा थिएन,’ उनले भने, ‘यस पटक ५० हजार डलर खर्च हुन्छ, सहयोग गरिदिन म सबैसँग आग्रह गर्दछु।’उनले नेपालमा सगरमाथा आरोहण गर्ने पहिलो दृष्टिविहीन व्यक्ति बन्न आफू आतुर रहेको बताए।

केसीले लायन्स क्लब इन्टरनेसनल १०० वर्ष पुगेको अवसरमा आफूले सन् २०१७ मा क्लबको झण्डा बोकेर सगरमाथा आरोहणमा गएको तर चौथो आधार शिविरमा पुगेर अक्सिजन समाप्त भएर फर्किएको सुनाए।

उनले भने, ‘मैले त्यतिबेला पनि सगरमाथाको सपना त्यहीँ छोडेर शरीर लिएर फर्केको छु भनेको थिएँ। मैले त्यतिबेला पनि पुनः आउने भनेको थिए। अहिले सगरमाथा चढ्ने तयारी सुरू गर्दैछु।’ 

सन् २०२१ मा उद्योग वाणिज्य संघको झण्डा बोकेर ८ हजार मिटरमाथि पुगेका केसीले अक्सिजन र पैसा सकिँदा फर्किनुपरेको गुनासो गरे। मानसिकरूपमा तयारी अवस्थामा भए पनि आर्थिक अभावको कारणले यो अभियान संकटमा परेको उनले सुनाए। उनले यो अभियान सफल पार्नको लागि आर्थिक सहयोग गर्न आग्रह सबैमा आग्रह गरेका छन्।   रासस