माइक्रो र मोटरसाइकल ठोक्किदा आगलागी, एकको मृत्यु, तीन घाइते

काठमाडौं- दाङमा माइक्रो र मोटरसाइकल ठोक्किदा आगलागी भई एक जनाको ज्यान गएको छ। दुर्घटनामा थप तीन जना घाइते छन्।

तुलसीपुर-घोराही सडकखण्डमा माइक्रो र मोटरसाइकल ठोक्किदा तुलसीपुर उपमहानगरपालिका-१८ का २१ वर्षीय रेशम चौधरीको मृत्यु हो।

गम्भीर घाइते भएका चौधरीको उपचारका क्रममा: राप्ती प्रादेशिक अस्पतालमा मृत्यु भएको प्रहरीले  जनाएको छ। दुर्घटनामा तुलसीपुर १८ का मोटरसाइकल चालक २२ वर्षीय रमेश वली, माइक्रो चालक तुलसीपुर ७ पर्नीका करण परियार र उनका भाइ २४ वर्षका कमल परियार घाइते छन्। करण र रमेशलाई थप उपचारका लागि बाँके लगिएको छ।

घोराहीबाट तुलसीपुरतर्फ आइरहेको बा३ख ८६४३ नम्बरको यात्रुबहाक माइक्रो र तुलसीपुरबाट घोराहीतर्फ जाँदै गरेको नम्बर नखुलेको मोटरसाइकल आइतबार बेलुकी ९ बजेतिर तुलसीपुर १८ दुधरासमा एक आपसमा ठोक्किएका थिए।

दुर्घटनापछि मोटरसाइकलको ट्याङ्की फुटेर आगलागी भएको प्रहरीले जनाएको छ। आगलागीबाट माइक्रो र मोटरसाइकल जलेर नष्ट भएका छन्।