युक्रेनमा फसेका नेपालीको उद्धारका लागि उच्चस्तरीय संयन्त्र गठन

काठमाडौं- युक्रेनमा रहेका द्वन्द्व  प्रभावित नेपालीको उद्धारको लागि सरकार र एनआरएनएले उच्चस्तरीय संयन्त्र गठन  गरेका छन्। विगत केही दिनदेखि जारी रुस र युक्रेनको युद्धबाट प्रभावित नेपालीको उद्धार एवं सहयोगको सम्भावनाबारे छलफल गर्न  शनिबार भर्चुअल माध्यमबाट अन्तरक्रिया गरिएको थियो।

गैरआवासीय नेपाली संघको आयोजनामा भएको अन्तरक्रियामा युद्धको चपेटमा परेका नेपाली समुदायको उद्धार र सहयोगको लागि जर्मनीका लागि नेपाल राजदूत रामकाजी खड्काको अध्यक्षतामा 'रुस-युक्रेन द्वन्द्व  प्रभावित नेपालीको सहयोग एवं उद्धार उच्चस्तरीय समिति' गठन गरिएको छ । 

युक्रेनमा लगातार दूतावास वा नेपाली समुदायको सम्पर्कमा रहे पनि नयाँ देश पुग्नेवित्तिकै सम्पर्क टुट्ने भएकोले युक्रेनबाट जोगिएर छिमेकी देश स्लोभाकिया, पोल्याण्ड, रोमानिया लगायतका देशमा पुग्ने गरेका अन्य नेपालीलाई सहयोग जुटाउन समस्या परेको छ।

जर्मनीस्थित नेपाली दूतावासले युक्रेन र वरिपरिका देशहरूमा रहेका नेपाली समुदाय तथा गैर नेपाली संघसंस्थाहरू परिचालन गरेर सक्दो सहयोग गर्ने प्रयास गरिरहेको छ। भर्चुअल बैठकमा जर्मनीका लागि नेपाली राजदूत रामकाजी खड्काले अहिलेसम्म २ सय १९ जना नेपाली सम्पर्कमा आएको जानकारी दिएका छन्।

उनले १० जना नेपालीलाई यात्रा अनुमतिपत्र पनि उपलब्ध गराएको जानकारी दिए। पोल्याण्ड, हंगेरी, रोमानिया र स्लोभाकियालगायतका नजिकैका देशमा रहेका नेपाली समुदायसँग समन्वय गरी दूतावासले उद्धार कार्य दूतावासले छिमेकी देशहरूमा रहेका भारतीय दूतावासहरूसँग पनि सहयोगका लागि पत्राचार गरिएको राजदूत खड्काले जानकारी दिए।

यस्तै द्वन्द्व  पीडितको लागि आवश्यक स्वास्थ्य सेवा उपलब्ध गराउनको डा. बोधराज सुवेदीको संयोजकत्वमा एक उपसमितिसमेत गठन गरिएको छ। 

गैरआवासीय नेपाली संघ (एनआरएनए)का अध्यक्ष कुमार पन्तले द्वन्द्वग्रस्त मुलुक युक्रेनमा रहेका नेपालीलाई नआत्तिन आग्रह गरेका छन्। उनले एनआरएनएले सहयोग गरिरहेको र गर्ने प्रतिवद्धतासमेत जनाएका छन्।