काठमाडौं- सरकारको आग्रहमा प्रतिनिधिसभाको बैठक आइतबार दिउँसो १ बजेसम्मका लागि फेरि स्थगित गरिएको छ।
कानुनमन्त्री दिलेन्द्र बडूले सभामुख अग्निप्रसाद सापकोटालाई भेटेर बैठक सार्न आग्रह गरेसँगै संसद् बैठक आइतबारसम्मका लागि सारिएको संसद् सचिवालयले जनाएको छ।
एमसीसी संसद्मा आइतबार नै पेस भइसकेको छ। तर, त्यसमाथि बहस हुन सकिरहेको छैन। एमसीसीमाथि बिहीबारको संसद् बैठकमा छलफल हुने कार्यतालिका थियो। तर, प्रधानमन्त्री शेरबहादुर देउवाको आग्रहमा अन्तिम समयमा स्थगित गरिएको थियो।
बिहीबार स्थगित गरेर शुक्रबार दिउँसो १ बजेका लागि तय गरिएको संसद् बैठक पुन: सरकारकै आग्रहमा स्थगित भएको हो।