जेब्रा झोलामा भेटिएको शवको सनाखत, परिवारकै सदस्यले हत्या गरेको आशंका

विराटनगर– सुनसरीको धरान–४ मा एक साताअघि जेब्रा झोलामा भेटिएको शवको सनाखत भएको छ। शव झापाको दमक नगरपालिका–५ का ४३ वर्षीय दिनेश सिग्देलको रहेको प्रहरीले जनाएको छ। 

शरीरलाई टुक्राटुक्रा बनाई जेब्रा झोलाभित्र प्याक गरेर धरान–भेडेटार सडक खण्डको जंगलमा फ्यालिएको अवस्थामा शव भेटिएको थियो। सिग्देल वैदेशिक रोजगारीका लागि बहराइन पुगेर फर्किएको पाइएको प्रदेश १ प्रहरी कार्यालयका प्रवक्ता एसपी नविनराज राईले बताए। बहराइनबाट नेपाल फर्किएपछि परिवारकै सदस्यको संलग्नतामा उनको हत्या भएको पाइएको बताइएको छ।

सिग्देलको हत्यामा संलग्न एक महिलासहित दुई जनालाई प्रहरीले सोमबार राति पक्राउ गरेको छ। पक्राउ परेकाहरुको नाम सार्वजनिक गरिएको छैन। स्रोतका अनुसार अनुसार हत्यामा संलग्न एक जना मृतककी कान्छी श्रीमती हुन्। तर, प्रहरीले पुष्टि गर्न बाँकी छ।

सिग्देलको हत्या मोरङमा गरेर शरीर टुक्रा बनाई धरानमा फालिएको प्रहरीको आशंका छ। प्रहरीले यसअघि शव फेला परेको ४ दिनसम्म पनि पहिचान खुल्न नसकेपछि स्केच फोटो सार्वजनिक गरेको थियो ।