केपी ओलीसहित एमालेका ५ नेताले भ्रष्टाचार गरेको भन्दै अख्तियारमा उजुरी

काठमाडौं- नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीसहित ५ नेताविरुद्ध अख्तियार दुरुपयोग अनुसन्धान आयोगमा भ्रष्टाचार गरेको आरोप लगाउँदै उजुरी दर्ता भएको छ। माधवकुमार नेपाल नेतृत्वको नेकपा (एकीकृत समाजवादी)को विद्यार्थी सङ्गठन अनेरास्ववियूले  ओलीसहितका नेताहरूविरुद्ध उजुरी दर्ता गराएको हो। 

प्रधानमन्त्री रहेका बेला एमाले अध्यक्ष ओलीलगायतले विभिन्न प्रकरणमा भ्रष्टाचार गरेको आरोप लगाइएको छ। तत्कालीन उपप्रधानमन्त्री समेत रहेका एमाले वरिष्ठ उपाध्यक्ष ईश्वर पोख्रेलविरुद्ध पनि विद्यार्थीहरूले उजुरी दर्ता गराएका छन्।

यस्तै ओली नेतृत्वको सरकारमा नै पर्यटनमन्त्री रहेका नेता योगेश भट्टराई, पद्मा अर्याल र भानुभक्त ढकालविरुद्ध पनि भ्रष्टाचारमा उजुरी दर्ता भएको अख्तियारले जानकारी दिएको छ। ढकाल र पोखरेलले स्वास्थ्य सामग्री खरिदमा भ्रष्टाचार गरेको आरोप लगाइएको छ भने अर्यालले झापास्थित गिरीबन्धु टी स्टेटको जग्गा हिनामिना गरेको आरोप लगाइएको छ। 

तत्कालीन पर्यटनमन्त्री योगेश भट्टराईले नेपाल भ्रमण वर्ष २०२० को नाममा व्यापक अनियमितता गरेको आरोप नेकपा एस निकट विद्यार्थीको छ।