काठमाडौं- पेरिस सेन्ट जर्मेन पीएसजीका फरवार्ड केलियन एम्बाप्पेको एक गोल सहयोगमा मंगलबार राति रियल मड्रिडविरुद्ध पीएसजीले जित निकालेको छ।
पीएसजीको पार्क डेस प्रिन्सेस मैदानमा सम्पन्न खेलमा घरेलु टिमले पाहुना टिमविरुद्ध १–० गोलको जित निकालेको हो।
निकै प्रतिस्पर्धात्मक खेलमा ५८ प्रतिशत समय बलमा नियन्त्रण बनाएको पीएसजीले इन्ज्युरी समयमा गोल गरेको हो। इन्ज्युरी समयको चार मिनेटमा नेयमारले दिएको पासको सदुपयोग गर्दै एम्बाप्पले निर्णायक गोल गरेका थिए।
त्यसअघि खेलको ६०औं मिनेटमा कार्भान्जलले बल जित्ने क्रममा पीएसजीका एम्बाप्पेलाई लडाएपछि रेफ्रीले घरेलु टिमलाई पेनाल्टी दिएका थिए। घरेलु टिमका प्लेमेयर लियोनेल मेस्सीले पेनाल्टीमा गोल गर्न सकेनन्। यससँगै पीएसजी अग्रता बनाउने अवसरबाट चुकेको थियो।