भूमि आयोगसँग सम्झौता गर्न आलटाल गरेको आरोप

बुटवल- रुपन्देहीको तिलोत्तमा नगरपालिकाले भूमिहीन र अव्यवस्थित बसोबासीलाई जग्गाधनी प्रमाणपत्र दिने प्रक्रिया अघि बढाउन राष्ट्रिय भूमि आयोगसँग सम्झौता गर्न आलटाल गरेको भन्दै यथाशीघ्र सम्झौता गर्न पाँच दलले नगरपालिकासँग माग गरेका छन्।

जिल्लाका अन्य स्थानीय तहहरुले भूमि आयोगसँग सम्झौता गरी जग्गाधनी प्रमाणपत्र दिने प्रकृया अघि बढाइसके पनि तिलोत्तमा नगरपालिकाले विभिन्‍न बहानाबाजी गरेर सम्झौता गर्न बेवास्ता र आलटाल गरेको पाँच दलको आरोप छ।

नेपाली कांग्रेसका नगर सभापति हरिलाल पाण्डे,नेकपा माओवादी केन्द्रका अध्यक्ष बेलप्रसाद शर्मा, नेकपा एकीकृत समाजवादीका अध्यक्ष राजेन्द्रप्रसाद सुवेदी, राष्ट्रिय जनमोर्चाका अध्यक्ष शिवराज घिमिरे र राष्ट्रिय जनमुक्ति पार्टीका भोमबहादुर बुढामगरले संयुक्त विज्ञप्ति जारी गर्दै नगरपालिकाको रवैयाले आफूहरुलाई गम्भीर बनाएको उल्लेख गरेका छन्।

नगरपालिकाले यथाशीघ्र सम्झौता गरी प्रकृया अघि नबढाए भूमिहीन र अव्यवस्थित बसोबासीसहित पाँच दलले नगरपालिकाविरुद्ध आन्दोलनका कार्यक्रम अघि बढाउने नेपाली कांग्रेस नगर सभापति हरिलाल पाण्डेले बताए। रुपन्देहीका देवदह र सिद्धार्थनगर नगरपालिकाले आयोगसंग सम्झौता गरी प्रकृया अघि बढाइसकेका छन्।