चेल्सीले जित्यो क्लब विश्वकपको उपाधि

काठमाडौं– पाल्मरीसलाई हराउँदै चेल्सीले पहिलो पटक क्लब विश्वकपको उपाधि जितेको छ। अबुधाबीमा शनिबार राति सम्पन्न खेलमा चेल्सीले अतिरिक्त समयमा २–१ को जित निकाल्दै उपाधि जितेको हो।

चेल्सीलाई उपाधि दिलाउन रोमेलु लुकाकू र केई हभाट्सले गोल गरे। निर्धारित ९० मिनेटसम्म १–१ को बराबरी भएपछि खेलको ११७औं मिनेटमा चेल्सीले पेनाल्टीको अवसर पाएको थियो। केई हभाट्सले पेनाल्टीमा गोल गरेपछि चेल्सीले उपाधि जित्यो।

त्यसअघि खेलको ५५ औं मिनेटमा लुकाकूले चेल्सीलाई अग्रता दिलाएका थिए। ६४औं मिनेटमा पाल्मेरिजले पेनाल्टीको अवसर पाएपछि कावालकन्टीले खेल बराबरी गरेका थिए।

शनिबार जित निकालेपछि चेल्सीका प्रशिक्षक थोमस टुचेलले यो जित क्लबका मालिक रोमन अब्राहमोविचलाई समर्पण गरेका छन्। ‘यो उनको लागि हो। यो उनको उपाधि हो भन्नेमा कुनै शंका नै छैन,’ उनले भने।

उनले अगाडी भने,‘उपाधि जितेपछि हामीले मैदानमा भेट गर्‍यौँ। उनले बधाई दिए, मैले पनि बधाई छ यो तपाईँको क्लबको र तपाईँको उपाधि हो। तपाईँको शोखले यो भयो र म यसको एक पात्र हुन पाएँ।’

शनिबार राति नै सम्पन्न तेस्रो स्थानको खेलमा भने अल अहिलीले अल हिलालीलाई ४–० गोलले हराएर तेस्रो स्थान पक्का गरेको छ।