वर्ल्ड जुनियर टेनिस प्रतियोगितामा नेपालका ५ खेलाडीको सहभागिता

काठमाडौं- आईटीएफ वर्ल्ड जुनियर टेनिस प्रतियोगिता (एसिया ओसिएना प्रि क्वालिफाइङ) मा नेपालका पाँच खेलाडी सहभागी बन्दैछन्।

प्रतियोगितामा सहभागी हुन ५ खेलाडीसहित ६ सदस्यीय नेपाली टोली शुक्रबार श्रीलंकाको कोलम्बो प्रस्थान गर्ने भएको छ।

फागुन २ गतेदेखि ७ गतेसम्म हुने प्रतियोगिताको लागि नेपाली टिमका दुई पुरुष र तीन महिला खेलाडीले सहभागिता जनाउने भएका हुन्। पुरुषमा राजवीर प्रधान र बोरिस अधिकारी तथा महिलामा सुनिरा थापा, आध्या पौडेल र जेनी खड्काले प्रतिस्पर्धा गर्ने छन्।

यो प्रतियोगितापछि कोलम्बोमै फागुन ९ देखि १४ गतेसम्म हुने जुनियर डेभिस कपमा पुरुषमा अकी जुवेन रावत, राजवीर प्रधान र निश्चल कायश्थले खेल्ने छन्।

सोही समयमा हुने जुनियर बिली जिन किङ कपमा नेपाली महिला खेलाडी सुनिरा थापा, आइशा डोल्कर गुरुङ र प्रशंसा मोक्तानले सहभागिता जनाउने छन्। टोलीको प्रशिक्षकमा रामेश्वर थापा छन्।

टोलीलाई नेपाल टेनिस संघका सदस्यद्वय अजय विष्ट र निरेश श्रेष्ठले सातदोबाटोमा आयोजित एक कार्यक्रमबीच बिहीबार बिदाइ गरे।