भारी हिमपातले हुम्लाको जनजीवन प्रभावित, हवाई सेवा अवरुद्ध

सिमकोट- हुम्लामा बिहीबार बिहानदेखि भारी हिमपात हुँदा जनजीवन कष्टकर बनेको छ। हिमपातले सिमकोटलगायत बजार क्षेत्रमा चलपहल घटेको छ। यस्तै हिमपातका कारण जिल्लाबाट हुने हवाई उडानसमेत अवरुद्ध भएको छ। 

नेपालगञ्ज र सुर्खेतबाट उडानमार्फत गरिँदै आएको खाद्यन्न ढुवानीसमेत हिमपातका कारण बन्द भएको छ। हिमपातपछि सरकारी तथा गैरसरकारी कार्यालयको सेवा प्रभावित बनेको छ। 

यो हुम्लामा यस वर्ष दशौं पटक भएको हिमपात हो। हिमपातले अत्यधिक चिसो बढेको स्थानीयले बताएका छन्।

चिसो बढेका कारण मानिस घरबाहिर कम निस्कने गरेको पाइएको छ। हिमपात भइरहेकाले पशुवस्तु पनि गोठमै थुनेर राखिएका छन्।

एक गाउँबाट अर्को गाउँमा मानिस आउजाउ कार्य पनि बन्द छ। उत्तरी नाम्खा गाउँपालिकाका अधिकांश भागमा बाक्लो हिमपात भएको छ। लिमी र हिल्सा क्षेत्र सञ्चार सम्पर्कविहीन भएका छन्। सो गाउँपालिकाका चाला, यारी, न्यालु, नारा, लेकधिंगा क्षेत्रमा बाक्लो हिउँ परिरहेको छ। यस वर्ष हुम्लामा पहिलो हिमपात मंसिरमा भएको थियो।

यसैबीच जिल्ला प्रशासन कार्यालयको सम्पूर्ण सेवासमेत एक हप्ताका लागि स्थगन गरिएको छ। सहायक प्रमुख जिल्ला अधिकारी दशरथ राईलाई कोरोना देखिएपछि सेवा स्थगन गरिएको कार्यालयले जनाएको छ।