पारस र प्रतिभा सेञ्चुरी बैंकको ब्रान्ड एमबास्डर 

काठमाडौं- नेपाली राष्ट्रिय क्रिकेट टिमका कप्तान पारस खड्का र राष्ट्रिय भलिबल टिमकी सदस्य प्रतिभा मालीलाई सेञ्चुरी बैंक लिमिटेडले ब्रान्ड एम्बासडरमा नियुक्त गरेको छ। बैंकले पारस र प्रतिभालाई एक बर्षकालागि ब्रान्ड एम्बासडरमा नियुक्त गरेको हो। उनीहरुलाई कति रकममा एम्बासडरमा नियुक्त गरिएको त्यो भने खुलाइएको छैन। 

बैंकका प्रमुख कार्यकारी अधिकृत (सिइओ) तुल्सीराम गौतमले नेपालका दुई चर्चित खेलका खेलाडी पारस र प्रतिभालाई ब्राण्ड एम्बासडर बनाउन पाउनु आफ्नो लागि ठुलो कुरा रहेको बताए । उनले थपे, ‘दुबै खेलाडीको नियुक्तिले बैंकको लोकप्रियता तथा व्यावसाहिक अभिवृदिमा मद्धत पुग्ने छ।’

उनले आफ्नो दुवै ब्राण्ड एम्बासडरका खेलाडीलाई अन्तराष्ट्रिय स्तरमा थप सफलताको शुभकामना समेत व्यक्त गरे।

एम्बासडरमा नियुक्त भएपछि राष्ट्रिय क्रिकेट टिमका कप्तान पारस खड्काले सेञ्चुरी बैंकसँग पुरानो सम्बन्ध रहेको नेपालको जुनसुकै खेललाई माथि उठाउन कर्पोरेट क्षेत्रहरुको आवश्यकता रहेको औंल्याए। भलिबलकी चर्चित खेलाडी प्रतिभाले खेलाडीहरुलाई यस्तो खालको मौकाले भावी पिढीलाई खेलमा लाग्न प्रोत्साहन मिल्ने बताईन्।