क्रोएसियाले रच्ला त इतिहास ?

काठमाडौं-ऐतिहासिक रुपमा फाइनलमा पुगेको क्रोएसिया पहिलोपटक विश्वकप जित्ने योजनामा हुनेछ । ‘ग्रुप अफ डेथ’ समुहबाट माथि उठेको क्रोएसियाले नकआउट चरणमा संघर्षपूर्ण जित निकाल्दै फाइनल सम्मको यात्रा तय गर्न सफल भएको थियो । 

त्यसैले फाइनलमा पनि क्रोएसियाले फ्रान्सलाई पराजित गर्न सक्ने क्षमता राख्दछ । किनकी, क्रोएसियाले जारी विश्वकप यात्रामा उत्कृष्ट मानिएका टोलीलाई पनि पराजित गर्दै प्रमाण देखाएको छ ।

विश्वकपको फाइनलमा पुग्ने १३ औं राष्ट्रको रुपमा रहेको क्रोएसिया च्याम्पियन बने विश्वकप जित्ने नवौ राष्ट्र बन्ने छ । यतिमात्र हैन अहिलेसम्म फाइनल पुगेका मध्ये ८ टोलीले मात्रै उपाधि जित्दा क्रोएसियालाई विश्वकपले नयाँ च्याम्पियनको रुपमा पाउनेछ । अहिलेसम्म युरोपबाट मात्र १० राष्ट्रले फाइनलमा खेलेका छन् । 

क्रोएसियाको यो ऐतिहासिक यात्रामा कप्तान लुका मोड्रिक, इभान राकिटिच, इभान पेरिसिच, मारियो म्यान्जुकिच र गोलरक्षक सुवासिच हतियार हुनेछ ।

यता, उपाधिको दावेदार मानिएको फ्रान्स क्रोएसियालाई पराजित गर्दै विश्वकपका दोस्रोपटक च्याम्पियन बन्ने योजनामा हुनेछ । फ्रान्सको उपाधि यात्रामा टिनेजर केलियन बाप्पे, एन्टोइन ग्रिजम्यान, पल पोग्वा र ह्युगो लोरिस सारथी बन्नेछन् । फ्रान्सका प्रशिक्षक डिडियर डेसच्याम्पलाई खेलाडी र म्यानेजरको हैसियतमा विश्वकप जित्ने महत्वपूर्ण अवसर आएको छ ।

फ्रान्सले उपाधि जितेमा डेसच्याम्प खेलाडी र प्रशिक्षकको रुपमा उपाधि जित्ने तेस्रो व्यक्ति बन्नेछन् । यसअघि ब्राजिलका मारियो जागोलो र जर्मनीका फ्रानज बेकेनवाअरले खेलाडी र प्रशिक्षकको रुपमा उपाधि जित्न सफल भएका थिए ।