जसपाको आन्तरिक किचलो प्रदेशसम्मै, भट्टराई पक्षले गर्‍यो प्रशिक्षण बहिष्कार

जनकपुरधाम –  जनता समाजवादी दलभित्रको विवाद प्रदेशस्तरसम्म पुगेको छ। पार्टी अध्यक्ष उपेन्द्र यादव पक्षले आयोजना गरेको प्रशिक्षण कार्यक्रम बाबुराम भट्टराई र महेन्द्र यादव पक्षले बहिष्कार गरेका छन्। जसपा प्रदेश २ को सत्ताधारी दल हो। पार्टीको प्रदेशस्तरीय प्रशिक्षण कार्यक्रम महोत्तरीको बर्दिवासमा जारी छ।

प्रशिक्षणमा भट्टराई पक्षलाई बोलाइएको छैन। तर भट्टराई पक्षीय नेताहरु भने अध्यक्ष यादवले पार्टीमा एकलौटी निर्णय गर्न थालेपछि प्रशिक्षण बहिष्कार गरेको बताउँछन्। सोमबार सुरु भएको प्रशिक्षण कार्यक्रम बुधबारसम्म चल्नेछ। 

कार्यक्रममा विभिन्न ११ वटा विषयमा प्रशिक्षण दिइने जनाइएको छ। सोमबार २ विषयमा प्रशिक्षण दिइएको छ भने मंगलबार र बुधबार ९ वटा विषयमा प्रशिक्षण दिइने पार्टीले जनाएको छ। पार्टीभित्र देखिएको किचलोका कारण प्रशक्षिणमा यादव र भट्टराई पक्षधर नेताकार्यकर्ताले बहिष्कार गरेको उनी निकट नेताहरूले बताएका छन्। पार्टीभित्र केही समयदेखि भट्टराई र अध्यक्ष उपेन्द्र यादवबीच विवाद छ। 

अध्यक्ष यादवले पार्टीभित्र आफूखुसी निर्णय गर्न थालेपछि भट्टराई पक्षधर नेताहरु असन्तुष्ट छन्। जसपाका अध्यक्ष उपेन्द्र यादव हुन्। यस्तै संघीय परिषद् अध्यक्ष डा. बाबुराम भट्टराई छन् भने अशोक राई वरिष्ठ नेता हुन्। महन्थ ठाकुर समूहसमेत पार्टीमा रहेको बखत एकै ठाउँमा उभिएका यी नेताहरुबीच अहिले सम्बन्ध चिसिएको छ।

इस्तियाक राई, प्रदीप यादव, राजकिशोर यादव मात्रै होइन, कृषिमन्त्री महेन्द्र यादव समेत उपेन्द्रको एकलौटी गर्ने प्रवृत्तिविरुद्ध छन्।  

विवादको बिउ भने संघीय सरकारमा मन्त्री छनोटमा क्रममा देखिएको थियो। यतिबेला विवाद सतहमै देखिएको छ। गठबन्धन सरकारमा जसपाका तर्फबाट मन्त्री छनोट गर्न जसपाको कार्यकारिणी समितिले अध्यक्ष यादव, संघीय परिषद् अध्यक्ष भट्टराई र वरिष्ठ नेता राईलाई जिम्मेवारी दिएको थियो। तर  यादवमाथि आफू निकट नेताहरुलाई मात्रै मन्त्रीमा पठाएको आरोप छ।संघीय परिषद् अध्यक्ष भट्टराईको सिफारिसमा एक जनालाई पनि मन्त्री नबनाएपछि जसपाभित्र असन्तुष्टि चुलिएको थियो।

कार्यकारी निर्णयको अधिकार यादवमा मात्रै रहँदा अन्य नेताहरु निरीह छन्। स्रोतका अनुसार पार्टी विभाजन हुँदा यादवले इस्तियाक राईदेखि प्रदीप यादवसम्मलाई मन्त्री बनाउने आश्वासन दिएका थिए। तर सरकारमा अरूलाई नै पठाएपछि राई र यादवसमेत असन्तुष्ट छन्। इस्तियाक राई, प्रदीप यादव, राजकिशोर यादव मात्रै होइन, कृषिमन्त्री महेन्द्र यादव समेत उपेन्द्रको एकलौटी गर्ने प्रवृत्तिविरुद्ध छन्।  

राष्ट्रियसभा निर्वाचनका लागि उम्मेदवार चयनमा पनि यादवले एकलौटी गरेको भन्दै भट्टराई पक्ष असन्तुष्ट छ। दुई सिटमा उम्मेदवारी दिएको जसपाले आफू पक्षधर नेताहरुलाई मात्रै पठाएका छन्। यादवले निर्णय गर्दा पार्टीमा सामूहिक रुपमा छलफल नगर्ने र आफूखुसी निर्णय गर्ने गरेकाले पार्टीभित्र किचलोको कारण बन्न पुगेको हो। 

पार्टी विधानमा दुई अध्यक्षको व्यवस्था छ। भट्टराई पक्षधर नेताहरु भट्टराईलाई अर्को अध्यक्षको जिम्मेवारी दिएर अध्यक्ष उपेन्द्र यादवको हैकमवादी चरित्रलाई रोक्नुपर्ने पक्षमा छन् तर यादव पक्षधर नेताहरु भने भट्टराईलाई त्यो पद नदिएर विधान संशोधन गरेर एक अध्यक्षको पक्षमा छन्।