राष्ट्रिय सभा सदस्य निर्वाचन : लुम्बिनीमा ६ जनाको उम्मेदवारी दर्ता

बुटवल- लुम्बिनीमा राष्ट्रिय सभा सदस्य पदका लागी ६ जनाको मनोनयन दर्ता भएको छ। लुम्बिनीमा पाँच दलीय सत्ता गठबन्धनका तर्फबाट कांग्रेस, नेकपा एकिकृत समाजवादी र राष्ट्रिय जनमोर्चाका उम्मेदवारले मनोनयन दर्ता गरेका हुन् भने नेकपा एमालेले एकल उम्मेदवारी दिएको छ। 

आउँदो माघ १२ गते हुने राष्ट्रिय सभा सदस्यका लागि महिलातर्फ गठबन्धनबाट नेकपा एकीकृत समाजवादीका राजेन्द्र लक्ष्मी गैरे र एमालेका भारतीय उपाध्याय खनालको उम्मेदवारी परेको छ। त्यस्तै दलिततर्फ गठबन्धनका तर्फबाट राष्ट्रिय जनमोर्चाका कुल प्रसाद विश्वकर्मा (राजेश) र एमालेका तर्फबाट कृष्ण सुनारको उम्मेदवारी परेको छ।

त्यस्तै अन्य समूहमा सत्तागठबन्धनबाट कांग्रेसका युवराज शर्मा र एमालेका रामदयाल गुप्ताले उम्मेदवारी दर्ता गराएको प्रदश निर्वाचन कार्यालय दाङले जनाएको छ। 

उम्मेदवारविरुद्ध बुधवार दाबी विरोध गर्न सकिने कार्यतालिका रहेको प्रदेश निर्वाचन अधिकारी निमराज भट्टराईले जानकारी दिए।मनोनयन दर्ताका लागी मंगलवार विहान १० बजेदेखी दिउँसो ३ बजे सम्मको समय तोकिएको थियो। उम्मेदवारहरुको अन्तिम नामावाली आगामी २५ गते प्रकाशन गरिने सूचना अधिकारी गेहेन्द्र कुँवरले जानकारी दिए।

लुम्बिनी प्रदेशबाट एक जना दलित, एक जना महिला र अन्य समुदायका एक जना गरि ३ जना निर्वाचित हुनेछन्। राष्ट्रिय सभा सदस्य निर्वाचनका लागी लुम्बिनी प्रदेशमा ८१ जना प्रदेश सांसद र स्थानिय तहका प्रमुख तथा उपप्रमुख २ सय १५ गरी २ सय ९६ मतदाता छन्।