कोरियामा नेपाली तेक्वान्दो टोलीलाई स्वर्ण

काठमाडौं- दक्षिण कोरियामा भएको अन्तर्रा्ष्ट्रिय तेक्वान्दो च्याम्पियनसिपमा नेपाली राष्ट्रिय तेक्वान्दो टोलीले स्वर्ण जितेको छ। 

दक्षिण कोरियाको पोहाङमा शुक्रबार भएको पुरुषतर्फको टिम फाइटमा नेपालले फाइनलमा कोरियाको सिहान युनिभरसिटीलाई ५८-४६ को स्कोरे हराउँदै स्वर्ण जितेको हो। पाँच खेलाडी सम्मिलित पुरुष टिमले सेमिफाइनलमा पनि कोरियाकै टिमलाई ४८-४१ ले हराउँदै फाइनलको यात्रा तय गरेको थियो। 

पुरुष टिममा अनुज पुजारी, ज्ञानेन्द्र हमाल, वीर महरा, सागर गुभाजु र भुपेन्द्र श्रेष्ठ थिए। शुक्रबार नै भएको महिलातर्फको टिम फाइटमा भने नेपाली महिला टोली रजत पदकमै सीमित भए। ३ राष्ट्र सम्मेलित टिम फाइटको फाइनलमा नेपाली महिला टिम चिनसँग ५६-४८ ले स्तब्ध भएको थियो।

नेपाली महिला टिममा ज्ञानी चुनारा, निमा गुरुङ, निसा रावल, संगिता बस्याल र अस्मिता खड्का रहेको प्रशिक्षक विष्टले जानकारी दिए । खेलाडीको प्रदर्शनमा देखिएका केही कमजोरी पक्ष आगामी एसियन गेम्समा सुधार गर्दै खेलाडीले राम्रो प्रदर्शन गर्नेमा आफू विस्वस्त रहेको प्रशिक्षक विष्टले जानकारी दिए । नेपाली टोलीले शुक्रबारदेखि नै छुम्बिक हेल्थ एन्ड साइन्स युनिभरसिटीमा प्रशिक्षण सुरु गरिसकेका छन्।