माओवादी महाधिवेशन : निर्वाचन प्रक्रिया सुरु, १७४२ मतदाताको नामावली सार्वजनिक

काठमाडौं- नेकपा माओवादी केन्द्रको जारी ८‍औं महाधिवेशन अन्तर्गत मतदाताको नामावली सार्वजनिक भएको छ। माओवादी निर्वाचन आयोगले १७४२ जना महाधिवेशन प्रतिनिधि/मतदाताको नामावली प्रकाशन गरेको हो। 

यसअघि माओवादी केन्द्रका अध्यक्ष प्रचण्डले सर्वसम्मतिमा नेतृत्व चयनका लागि प्रस्ताव गरेका थिए। यद्यपि उनले सहमति नभए निर्वाचनमा जान सकिने बताएका थिए। 

अहिले माओवादी महाधिवेशन आयोजक कमिटीको बैठक बसिरहेको छ। कमिटीले साँझ ५ बजसम्म सहमति खोज्ने प्रयास गर्नेछ। सहमति नभए निर्वाचन प्रक्रिया अघि बढ्ने निर्वाचन आयोगले जानकारी दिएको छ। 

माओवादीमा २९९ सदस्यीय केन्द्रीय समिति निर्वाचित गर्ने प्रावधान छ। यसअघि १५ पदाधिकारी बनाउने विधानमा प्रस्ताव गरिएको भएपनि पदाधिकारीको संख्या थपघट गर्न सक्ने अधिकार केन्द्रीय समितिलाई दिइएको छ। माओवादीमा पदाधिकारीका आकांक्षी बढी देखिएपछि प्रचण्डलाई नेता व्यवस्थापन गर्न सहज बनाउनका लागि पदाधिकारीको संख्या निर्धारण गर्ने जिम्मा केन्द्रीय समितिलाई दिइएको हो। अध्यक्षका लागि भने प्रचण्डको विकल्पमा कसैले पनि दाबी गरेका छैनन्। यसले प्रचण्डलाई अध्यक्षमा निरन्तरता दिने देखिएको छ। 

माओवादीले ५० प्रतिशत खुला र ५० प्रतिशत समानुपातिक रूपमा केन्द्रीय समिति सदस्य चयन गर्नेछ। ५० प्रतिशत समानुपातिकमा दलित, मुस्लिम, थारु, मधेसी, आदिवासी जनजाति, खस आर्य, अपांगता, पिछडिएको क्षेत्र, महिला र युवाको ‘क्लस्टर’बनाइएको छ।