शीतलहरमा दलित विपन्नलाई परालको भर

सप्तरी- एक सातायता तराईमा बढेको शितलहरबाट जोगिन यहाँका दलित र विपन्न परिवार परालको भर पर्दै आएका छन्। डस्ना र सिरक किन्ने हैसियत नभएका परिवार जाडो छल्न परालको ओछ्यान बनाएर सुत्दै आएका छन्। 

विष्णुर गाउँपालिका-६ की ६० वर्षीया किसनी देवी सदाका अनुसार सिंगो बस्ती नै जाडोबाट जोगिन यस्तै गरिरहेको छ। उनले भनिन्, ‘ओढ्ने जे-जे ओढे पनि ओछ्यान भने पराल नै प्रयोग भइरहेको छ।’ 

स्थानीय ५० वर्षीय कारो सदा पनि जाडो महिनाभर यसरी नै बित्ने गरेको बताउँछिन्। ‘हामी जस्ता दलित विपन्नलाई जाडो छल्न कहिलेकाही संघसंस्थाहरूले ओढ्ने  वितरण गरेर सहयोग गरे पनि ओछ्याउने कसैले दिदैनन्। केटाकेटीदेखि बुढाबुढी सबै यसरी नै सुत्छौं।’ 

बिहानदेखि बेलुकासम्म चिसो हावा चल्ने, मुटु काम्ने जाडोबाट जोगिन पुस्तौ पुस्तादेखि पराल प्रयोग गर्दै आएको सोही वडाका वडा अध्यक्ष बहादुर सदाले बताए।