नेकपा माओवादी केन्द्र प्रदेश १ को नेतृत्व चयन गर्न मतदान हुँदै

विराटनगर‒ नेकपा माओवादी केन्द्र प्रदेश १ को नेतृत्व मतदानबाट टुङ्ग्याइने भएको छ। सर्वसम्मत नेतृत्व चयनका लागि पटक‒पटक भएका बैठक निष्कर्ष विहीन भएपछि बुधबार साँझ ७ बजेबाट मतदान हुने गरी निर्वाचन कार्यतालिका प्रकाशन गरिएको निर्वाचन समितिका संयोजक राजेन्द्र किराँतीले बताए। 

प्रदेश १ को अध्यक्ष पदमा दुई जनाबीच प्रतिस्पर्धा हुने भएको छ। आधा दर्जनभन्दा बढी आकांक्षी रहेको अध्यक्ष पदमा अन्तिममा हर्कबहादुर नेम्बाङ मिक्सो पाँचथर र मुक्साहाङ मेन्याङ्बो सुनसरीबीच हुने भएको हो। 

तीस जना पदाधिकारीका लागि ४० जना बढी आकांक्षी छन्। निर्वाचनमा २५९ जनाले मतदान गर्ने छन्। निर्वाचनको अन्तिम मतपरिणाम बुधबार राती नै सार्वजनिक गर्नेगरि काम अघि बढाइएको किराँतीले बताए। उनका अनुसार मनोनयन प्रक्रिया केहीबेरमा सुरु हुने छ। 

माओवादी प्रदेश १ को पहिलो अधिवेशन गत मंसिर २५ र २६ गते मोरङको विराटचोकमा सम्पन्न भएको थियो। अधिवेशनमा पदाधिकारी चयन हुन नसकेपछि कार्यदलले टुंगो लगाउने गरी अधिवेशन अन्त्य गरिएको थियो।