प्रदेश २ मा कांग्रेसको नेतृत्व चयनका लागि मतदान हुँदै

काठमाडौं- नेपाली कांग्रेस प्रदेश २ को पहिलो अधिवेशन अन्तर्गत आज नेतृत्व चयनका लागि मतदान हुँदैछ।कांग्रेसको विधान अनुसार ८ पदाधिकारीसहित ७२ सदस्यीय प्रदेश कमिटी निर्वाचित हुनेछ।

जसका लागि १८० जनाको उम्मेदवारी परेको छ। दिउँसो १ बजेदेखि ५ बजेसम्म मतदानको समय तोकिएको छ। मतदानका लागि भित्र प्रवेश गरिसकेका प्रतिनिधि (मतदाता)ले अवेरसम्म पनि मतदान गर्न पाउने भनिएको छ। 

प्रदेश सभापतिमा कृष्णा प्रसाद यादव र रामसरोज यादवबीच प्रतिपर्धा हुने भएको छ।  शेरबहादुर देउवा पक्षबाट कृष्णालाई  र विमलेन्द्र निधि-शेखर कोइराला समूहबाट रामसरोजले उमेदवारी दर्ता गराएका छन्।  दुबै समूहले प्यानल बनाएर उम्मेदवारी दिएपछि कडा प्रतिस्पर्धा हुने देखिएको छ। 

यस्तै दुईजना उपसभापतिका लागि पाँच जनाको उम्मेदवारी परेको छ। देउवा समूहबाट वीरेन्द्रप्रसाद सिंह र चन्द्रशेखर कुमार यादव तथा निधी-कोइराला समूहबाट धनलाल ठोकर र बिनोदकुमार खनालले उपसभापति पदमा उमेदवारी दिएका छन्। रामाधारप्रसाद यादव भने स्वतन्त्र रुपमा उपसभापतिको उमेदवार बनेका छन्। 

यस्तै २ महामन्त्रीका लागि पनि ५ जनाको उम्मेदवारी परेको छ। निधी-कोइराला समूहबाट नरेश यादव र हरेश महतोले उमेदवारी दिएका छन् भने देउवा पक्षबाट बृहस्पति कृष्ण श्रेष्ठ र उपेन्द्र कुमार यादव उम्मेदवार बनेका छन्। स्वतन्त्र उम्मेदवारका रुपमा बिनोद चौधरीले उमेदवारी दिएका छन्। यस्तै ३ सहमहामन्त्रीका लागि  ११ जनाले उम्मेदवारी परेको छ।