राष्ट्रिय टोलीको कप्तान भएपछि सन्दीपले लेखे– सबै खेलाडीलाई बराबरी प्राथमिकता दिन्छु

काठमाडौं– नेपाल क्रिकेट संघ (क्यान)ले आफूलाई राष्ट्रिय क्रिकेट टोलीको कप्तानमा नियुक्त गर्ने निर्णय गरेपछि सन्दीप लामिछानेले आफ्नो धारणा व्यक्त गरेका छन्।

उनले आइतबार सामाजिक सञ्जालमा विभिन्न विषयमा आफ्नो धारणा राखेका हुन्। उनले नेपाली टिमलाई एकजुट बनाउने, नेपाललाई विश्व क्रिकेटमा राखिरहने र सबै खेलाडीलाई बराबरी प्राथमिकता दिने बताएका छन्।

‘छातीमा नेपालको झण्डा बोक्ने सधैं मेरो सपना थियो र अब मैले नेपाली क्रिकेट टोलीको नेतृत्व गर्ने अवसर पाएको छु। यो जिम्मेवारीले आफूलाई सम्मानित भएको महसुस गरेको छु। म क्यानप्रति कृतज्ञ छु। नेपालका जनता र विश्वभरिका सबै फ्यानहरूलाई उनीहरूको निःशर्त समर्थन र प्रार्थनाको लागि पनि कृतज्ञ छु। नेपाली टोलीका रूपमा हाम्रो योजना सरल रहनेछः नेपाललाई विश्व क्रिकेटको नक्सामा प्रभावकारी रूपमा राख्ने हाम्रो योजना हुनेछ। यो हुनको लागि हामी एक परिवार, एक टोली, एक इकाईको रूपमा खेल्नेछौं। यस टोलीको ढोका सबैका लागि खुला रहनेछ। सबै सहयोगी राष्ट्रहरूले हामीलाई पूर्ण रूपमा समर्थन गरेका छन्। क्यान र आईसीसीसँगको छलफलमा हामीले पूर्ण सदस्य राष्ट्रहरूसँग थप क्रिकेटको लागि पनि पुग्नुपर्छ। हामीसँग धेरै कामहरू छन् र सँगै भएर हामी जे पनि गर्न सक्छौं,' लामिछानेले भनेका छन्। 

Together we can achieve anything. #Honored #JaiNepal?? pic.twitter.com/pzQQTFYHSM

— Sandeep Lamichhane (@Sandeep25) December 19, 2021