मृत डाँफेसहित मुगुमा एक जना पक्राउ

मुगु- जिल्ला प्रहरी कार्यालय मुगुले संरक्षित पंक्षी डाँफेसहित एक जनालाई पक्राउ गरेको छ। छायानाथ रारा नगरपालिका-३ का २० वर्षीय ध्रुवराज रोकायालाई प्रहरीले डाँफेसहित पक्राउ गरेको हो। 

उक्त पंक्षी फूली गाउँको पाँपे भन्ने जंगलमा मृत अवस्थामा फेला पारेको रोकायाले बताएका छन्। कार्यालयबाट खटिएको प्रहरी अधिकृतसहितको टोलीले रोकायालाई पक्राउ गरेको प्रहरी नायव उपरीक्षक सुवास हमालले बताए। 

डिभिजन वन कार्यालय मुगुका अनुसार वन ऐन २०२९ अनुसार उनलाई कारबाही प्रक्रिया अघि बढाइनेछ। पशुपंक्षी चोरी शिकारी गर्ने व्यक्तिलाई तीनदेखि ९ महिना र १५ देखि २५ हजार नगदसहित दुवै सजाय हुने वन अधिकृत भरत बुढ्थापाले बताए। 

पक्राउ परेको पंक्षी पोथी डाँफेको तौल करिब दुई किलोग्राम छ।