नयाँ इतिहास रच्ने दाउमा रहेको बेल्जियमको विश्वकप इतिहास

काठमाडौं-विश्वकपको इतिहासमा बेल्जियम सबभन्दा पुरानो टिम मध्येको एक हो । १९३० मा उरुग्वेमा आयोजित पहिलो विश्वकपबाट उपस्थिति जनाएको बेल्जियमले अन्तराष्ट्रिय फुटबलमा प्रभाव जमाउन थालेको धेरै भएको छैन । 

पहिला अन्तराष्ट्रिय फुटबल इतिहासमा फुटबल विज्ञहरुका नजरमा आफैँ सफलता हासिल गर्न नसक्ने तर कहिलेकाहीँ ठूला टोलीलाई स्तब्ध पार्न सक्ने 'डार्क हर्स' को छविमा सीमित थियो बेल्जियम । तर, अन्तराष्ट्रिय फुटबलमा खासै जम्न नसकेको बेल्जियामले जारी विब्वकपमा आफ्नो दमदार खेल प्रस्तुत गर्दै आफुलाई साबित गरिसकेको छ । 

चार वर्षअघि ब्राजिलमा सम्पन्न प्रतियोगितामा बेल्जियमको उपस्थिति राम्रै पुनरागमन थियो । प्रिमियर लिगका स्टारहरूले भरिभराउ टोली बेल्जियम त्यतिबेला ब्राजिल पुग्दा, बेल्जियन फुटबलको स्वर्णीम पुस्ताले आफ्नो छवि परिवर्तन गरिसकेका थिए । बेल्जियम माथिको आशा पनि त्यही अनुपातमा वृद्धि भएको थियो । प्रिमियर लिगका साथै युरोपका अन्य लिगमा वर्षभर तहल्का मच्चाइरहेका खेलाडीले ब्राजिलमा त्यही अनुसारको प्रदर्शन पनि गरे ।

ब्राजिलमा प्रभावशाली उपस्थिति जनाएको टोलीले क्वार्टरफाइनलसम्मको यात्रा गर्‍यो । २०१४ को विश्वकपमा अन्तिम आठमा अर्जेन्टिनासँग १-० ले पराजित भएपछि बेल्जियमको यात्रामा पूर्णविराम लाग्यो । त्यही अर्जेन्टिना फाइनलसम्म पुग्दा बेल्जियमको टोलीमा दम थियो भन्ने प्रमाणित भयो । विश्वकपमा १३ औं पटक सहभागिता जनाएको बेल्जियमका लागि सबभन्दा सफल नतिजा १९८६ मा सेमिफाइनलसम्म पुग्नु थियो । त्यही उपलब्धि बराबरी गर्नबाट अघिल्लो संस्करणमा टोली थोरैले मात्र चुक्यो । तर, जारी विश्वकपमा पुनः सन् १९८६ को इतिहास दोहर्‍यायको बेल्जियमले आफ्नो त्यो रेकर्ड तोड्ने दाउमा हुनेछ ।

त्यति बेला बेल्जियम अन्तराष्ट्रिय फुटबलमा छवि परिवर्तनको चरणमा थियो । ठूला प्रतियोगिताका कठिन खेलको खास अनुभव बेल्जियन टोलीमा थिएन । तर, अहिले स्थिति परिवर्तन भइसकेको छ । बेल्जियमको वर्तमान टोलीले उच्च स्तरमा लगातार प्रतिस्पर्धा गर्दै अनुभब मात्र हैन सफलता पनि हासिल गरिसकेको छ । 

युरोपेली छनोट अन्तर्गत समूह 'एच' बाट विजेताको रूपमा रूसको टिकट पक्का गर्दा बेल्जियमले एउटै खेलमा हार सामना गर्नुपरेन । समूहका १० मध्ये ९ खेलमा जित हासिल गरेको बेल्जियमले ग्रिससँगको एउटा खेलमा मात्र १-१ को बराबरी खेलेको थियो । छनोटका क्रममा १० खेलमा ४३ गोल गर्दै आक्रमणको धार तिखो भएको प्रमाण दिएको टोलीले ६ गोल मात्र खाएर रक्षापंक्ति पनि सशक्त रहेको सन्देश दिसकेको थियो । 

जुन अब्बलता विश्वकप क्वालिफाइ खेलमा देखाएको थियो त्यही अब्बलता जारी विश्वकपमा पनि सेमिफाइनल यात्रा सम्म प्रदर्शन गरि सकेको छ । जारी विश्वकपमा बेल्जियमले कुनैपनि खेल गुमाएको छैन् ।

अभ्यास खेलमा पनि उच्च लयमा रहेको लुकाकु, जारी विश्वकपमा पनि लयमै रहेका छन् । कप्तान इडेन हाजार्डले २०१५ मा व्यावसायिक खेलाडी संघको उत्कृष्ट खेलाडी अवार्ड जितेका थिए भने म्यानचेस्टर सिटीका केभिन डी ब्रुयन गत सिजनका विजेता हुन् ।

आक्रमणको जिम्मा लुकाकुले पाउँदा उनीभन्दा पछाडि रहेर हाजार्ड र डी ब्रुयनले सघाइ रहेका छन् । चेल्सीका गोलकिपर थियाबाउट कोर्टोइस टिमका अर्का मुख्य आकर्षण बनेकाछन् ।