विश्वकपमा फाइनलको झल्को : फ्रान्स र वेल्जियमबीचको खेल

काठमाडौं-विश्वकपको सेमिफाइनल खेलमा मंगलबार राति बेल्जियम र फ्रान्स भिड्दा विश्वकप फाइनल खेलको झल्को दिने अनुमान गरिएको छ । आ-आफ्नै विशेषता रहेका यी दुबै टोलीलाई एक अर्काबीचको दबाब पनि उत्तिकै छ । 

फ्रान्स खेलमा बहुप्रतिभाको रुपमा चिनिन्छ भने बेल्जियम आफ्नो टीम खुबिका रुपमा चिनिन्छ । तर, फ्रान्सका डिफेन्डर राफेल भेरानले बेल्नियमका इडेन हाजार्ड  र रोमेलु लुकाकु टिमकालागि सबैभन्दा ठुलो खतरा हुने बताएका छन् । 

लुकाकु र हाजार्ड दुवैले रसिया विश्वकपमा उच्च प्रदर्शन गरिरहेका छन् । फ्रान्सका सेन्टर ब्याक भेरान पनि विश्वकपमा उच्च प्रदर्शन गर्ने मध्येमा पर्दछन् । उनी बेल्जियमलाई हल्का लिन नमिल्ने बताउँछन् । यसरी फ्रान्सका खेलाडीले आफ्नो विपक्षी टोलीको तारिफ गर्दै आफ्नो मनोबल कमजोर बनाएको अनुमान गर्न सकिन्छ ।

भेरानले बेल्जियन टोली युवा भएपनि परिपक्व रहेको उल्लेख गरे । 'हामीलाई थाहा छ खेल कठिन हुनेछ,' उनले थपे, 'शारीरिक रुमा बलिया लुकाकु जुन सुकै रक्षापक्तिका लागि पनि खतरानाक हुनसक्छन् । उनी स्तरीय खेलाडी हुन् । उनलाई हामीले कुनै ठाँउ दिनुहुन्न ।' 

उनले हाजार्डको पनि तारिफ गरेका छन् । 'उनी जति बेला लयमा आएदेखि म उनको विरुद्धमा खेलिसकेको छु,' रियल म्याड्रिडका रक्षक उनले भने, 'उनी स्तरीय खेलाडी हुन् र उनको ड्रिब्लिङ निकै राम्रो छ । हामी उनलाई पनि कुनै ठाँउ दिनेमा छैनौं । हामी सामूहिक रुपमा उनलाई रोक्ने प्रयास गर्नेछ ।'

आजको निक्कै रोमाञ्चक मानिएको फ्रान्स र बेल्जियममा कस्ले बाजी मार्ला त्यसका लागि खेल अवधिसम्म पर्खनुपर्नेछ ।