कांग्रेस सभापतिका लागि दोस्रो चरणको मतदान [तस्बिरमा]

काठमाडौं– कांग्रेस सभापतिका लागि राष्ट्रिय सभामा मतदान भइरहेको छ। मतदान सुरु भएको डेढ घण्टामा १ हजार मत खसेको निर्वाचन समिति सदस्य एगराज पोखरेलले जानकारी दिए

सोमबार भएको मतदानमा प्रतिस्पर्धामध्ये कसैले पनि ५१ प्रतिशत मत ल्याउन नसकेपछि दोस्रो चरणको निर्वाचन हुन लागेको हो। सभापतिका पत्यासी प्रकाशमान सिंह, विमलेन्द्र निधि र कल्याण गुरुङले शेरबहादुर देउवालाई समथर्न गरिसकेका छन्। अब शेखर कोइराला र शेरबहादुर देउवाबीच प्रतिस्पर्धा हुन लागेको हो। 

सोमबार बिहान घोषित मत परिणामअनुसार देउवाले सबैभन्दा बढी २२५८ मत ल्याएका छन्। उनले ८३ मत पुर्‍याउन नसक्दा निर्वाचन हुन लागेको हो। निर्वाचनमा कुल ४६७९ मत खसेको थियो। 

अर्का प्रतिस्पर्धा शेखर कोइरालाले १७२९ मत पाएका छन्। यसैगरी प्रकाशमान सिंहले ३७१, विमलेन्द्र निधिले २४९ र कल्याण गुरुङले २० मत पाए। यी तीनैजनाको मत जोड्दा ६४३ मत हुन्छ। जितका लागि देउवालाई ८२ मत र कोइरालालाई करिब ६ सय मत चाहिन्छ। अब देउवा र कोइरालाबीच पुनः प्रतिस्पर्धा हुनेछ। 

प्रदर्शनीमार्गमा डेउडा खेलेर आफ्ना उम्मेदवारलाई भोट माग्दै प्रतिनिधिहरू।