निधिलाई फकाउन निवास पुग्दै देउवा

काठमाडौं- नेपाली कांग्रेसको सभापतिका उम्मेदवार शेरबहादुर देउवा विमलेन्द्र निधिलाई फकाउन निवास जाने भएका छन्। मध्यवानेश्वरस्थित निधि निवासमा देउवा पुग्न लागेको स्रोतले बताएको छ।

कांग्रेसको सभापति चयनका लागि पुनः मतदान हुने भएपछि देउवाले राजनीतिक छलफललाई तिब्रता दिएका छन्। आइतबार बिहान सकिएको मतगणनामा सभापतिका उम्मेदवारहरूले बहुमत नपाएपछि पुनः मतदान हुने भएको छ।

कांग्रेस निर्वाचन समितिका अनुसार मतदान आज दिउँसो साढे तीन बजेदेखि हुने छ। सोमबार मतदान भएका तीन स्थानबाट नै मतदान हुने निर्वाचन समितिले जनाएको छ।

पहिलो चरणको मतदानमा शेरबहादुर देउवाले अरुले भन्दा बढी मत पाएपनि बुहमत पुर्‍याउन सकेनन्। कांग्रेसको विधान अनुसार सभापतिमा निर्वाचित हुन ५० प्रतिशतभन्दा बढी मत ल्याउनुपर्छ।

आइतबार भएको मतदानमा ४६७९ मत खसेको थियो। जसमा देउवाले २२५८ मत मात्र पाएका थिए। उनलाई सभापति निर्वाचित हुन ८२ मत कम  परेको थियो।

दोस्रो चरणमा सबैभन्दा धेरै मत ल्याउने देउवा र दोस्रो हुने डाक्टर शेखर कोइरालाबीच प्रतिस्पर्धा हुनेछ। कोइरालाले १७४९ मत ल्याएका छन्।