फ्रान्स र बेल्जियमको भिडन्त आज : को पुग्ला फाइनलमा ?

काठमाडौं- रसियामा जारी फिफा विश्वकप फुटबल प्रतियोगितामा मंगलबारबाट सेमिफाइनलका खेलहरु सुरु हुँदैछ । सेमिफाइनलको पहिलो खेलमा आज युरोपेली टोली फ्रान्स र बेल्जियमबीच प्रतिस्प्रर्धा हुँदैछ ।
 
खेल सेन्ट पिटर्सबर्गमा नेपाली समय अनुसार राती पौने १२ बजे सुरु हुनेछ । दोस्रो पटक विश्वकको उपाधि जित्ने होडमा रहेको फ्रान्स बेल्जियमलाई हराउदै फाइनलमा पुग्ने लक्ष्यमा छ भने बेल्जियम फ्रान्सलाई पन्छाउँदै पहिलो पटक फाइनलमा पुग्ने दाउमा छ । 

क्वार्टरफाइनलमा फ्रान्सले उरुग्वेलाई २-० गोलले पराजित गर्दै सेमिफाइनलमा स्थान बनाएको हो  भने ब्राजिललाई २-१ ले पाखा लगाउँदै बेल्जियमले फ्रान्ससंगको भेट पक्का गरेको हो ।

दुबै टिमसँग स्टार खेलाडी छन् । फ्रान्समा एन्टोइनी ग्रिजम्यान, किलियन एमबाप्पे, पाउल पोग्बा जस्ता खेलाडी  खेलाडी छन् । यता, बेल्जियममा पनि रोमेलु लुकाकु, इडन हर्जाड जस्ता चर्चित खेलाडी छन् ।

बेल्जियम र फ्रान्स अहिलेसम्म ७३ पटक भेट भएको छ । जसमा बेल्जियमले ३० पटक जितेको छ । त्यस्तै, फ्रान्सले २४ पटक जितेको छ भने यी दुई टिमले १९ खेलमा बराबरी खेलेका छन् । यी दुई टिमबीच पछिल्लो समयमा सन् २०१५ मा भेट भएको थियो । जुन खेलमा बेल्जियमले फ्रान्सलाई ४-३ गोलअन्तरले पराजित गरेको थियो ।