प्रदेश २ बाट कांग्रेस केन्द्रीय सदस्यमा ढुंगाना र रिजाल निर्विरोध

काठमाडौं– नेपाली कांग्रेसको जारी १४ औं महाधिवेशनमा प्रदेश २ बाट दुई जना केन्द्रीय सदस्य निर्विरोध निर्वाचित भएका छन्। आनन्द ढुंगाना र रमेश रिजाल निर्विरोध भएका हुन्। दुवै संस्थापन (देउवा) पक्षका नेता हुन्।

जंगीलाल रायले उम्मेदवारी फिर्ता लिएपछि उनीहरू केन्द्रीय सदस्यमा निर्विरोध भएका हुन्। महिला १ सहित खुला २ जनाको लागि ४ जनाको उम्मेदवारी परेको थियो।

प्रदेश २ बाट महिला केन्द्रीय एकजनाको लागि अब चित्रालेखा यादव र गीता चौधरीबीच प्रतिस्पर्धा हुने भएको छ।

नेपाली कांग्रेसको जारी महाधिवेशनमा शनिबार परेका उम्मेदवारी फिर्ता लिनका लागि आज आइतबार बिहान ११ बजेसम्मका लागि समय छुट्याइएको छ। 

कांग्रेस निर्वाचन समितिका अनुसार त्यसपछि उम्मेदवारको अन्तिम नामावली प्रकाशन हुनेछ। समितिले शनिबार राति उम्मेदवारको प्रथम नामावली प्रकाशन गरिसकेको छ। जसअनुसार १३४ पदका लागि ५४८ जनाको उम्मेदवारी परेको छ। सभापतिमा मात्र ६ जनाको उम्मेदवारी परेको छ। जसमा चार जना प्यानललसहित चुनावी मैदानमा छन्।

क्रम अनुसार सभापतिका लागि कल्याणकुमार गुरुङ, युवराज न्यौपाने, प्रकाशमान सिंह, डा शेखरप्रसाद कोइराला, विमलेन्द्र निधि र शेरबहादुर देउवालो उम्मेवादरी दर्ता गराएको समितिले जानकारी दिएको छ। 

आज मध्याह्न सवा १२ बजे उम्मेदवारको अन्तिम नामावली प्रकाशन हुने जनाइएको छ। सोमबार बिहान ८ बजेदेखि मतदान हुने जनाइएको छ। 

राष्ट्रियसभा गृह, महेन्द्र पुलिस क्लब र भृकुटीमण्डप गरि तीन स्थानमा मतदानको व्यवस्था मिलाइने जनाइएको छ। मतदान मतपत्र मार्फत गर्नु पर्ने छ। विद्युतीय मतदानको व्यवस्था गर्ने भनिएको भए पनि हुन नसकेको कांग्रेसले जनाएको छ। मतदानका लागि एक जनालाई ४५ मिनेट भन्दा बढी समय लाग्ने अनुमान गरिएको छ। 

महाधिवेशनमा महाधिवेशन प्रतिनिधिको संख्या ४ हजार ७४३ रहेको निर्वाचन समितिले जनाएको छ। कांग्रेसको विधानअनुसार सभापतिका उम्मेदवारले जितका लागि ५० प्रतिशतभन्दा धेरै मत ल्याउनुपर्छ। कुनै पनि उम्मेदवारले ५० प्रतिशतभन्दा बढी मत नल्याए सबैभन्दा बढी मत ल्याउने दुई उम्मेदवारबीच दोस्रो चरणको निर्वाचन हुने व्यवस्था छ।