स्थानीय तहका १६ सय कर्मचारीको सरुवा [सूचीसहित]

काठमाडौं- सरकारले एकै पटक स्थानीय तहका १६ सयभन्दा बढी कर्मचारीको सरुवा गरेको छ। अढाई वर्षअघि सेवा प्रवेश गरेका स्थानीय तहका १ हजार ६ सय १३ कर्मचारीको मंगलबार एकैपटक सरुवा गरिएको हो।

संघीय मामिला तथा सामान्य प्रशासन मन्त्रालयको अनुरोधमा २०७६ सालमा स्थानीय तहका लागि लोकसेवा आयोगले सिफारिस गरेका विभिन्न पदका ९ हजार ४ सय कर्मचारीमध्येबाट सरुवा गरिएको हो।

पठाउने र जाने दुवै स्थानीय तहका प्रमुख र प्रमुख प्रशासकीय अधिकृतको सहमतिमा सरुवा गरिएको मन्त्रालयले जनाएको छ। सरुवाका लागि निवेदन दिनेको संख्या २५ सयको हाराहारीमा रहेकोमा अन्य कर्मचारीको पनि क्रमशः सरुवा गरिने मन्त्रालयले जनाएको छ।

संघीय निजामती ऐनको अभावमा कानुन निर्माण नहुँदा स्थानीय तहका कर्मचारीको सरुवा हुन सकेको थिएन। कर्मचारी व्यवस्थापनसम्बन्धी मापदण्ड–२०७७ मन्त्रिपरिषद्बाट पारित गराएर सोही आधारमा सरुवा गरिएको हो।