युरोकप नै बन्यो विश्वकप पनि 

२१औं संस्करणको विश्वकप फुटबलको सेमिफाइनलमा फ्रान्स, बेल्जियम, इङल्यान्ड र क्रोएसिया पुगेका छन् । यी सबै टोलीले युरोप महादेशबाट विश्वकपमा सहभागीता जनाएका थिए ।

क्वाटरफाइमा पुगेका दक्षिण अमेरिकी टोली ब्राजिल र उरुग्वे विश्वकपबाट बाहिरिएसँगै विश्वकपमा युरोपेली राष्ट्र मात्र रहेका छन् । विश्वकप तथा फुटबलका विज्ञहरुले गरेको अनुमान पनि विफल हुदै जादा यो पटकको विश्वकपले नयाँ इतिहास भने बनाउने निश्चित छ ।

बेल्जियमले ब्राजिललाई २-१ गोलले, फ्रान्सले उरुग्वेलाई २-० गोलले, इङल्यान्डले स्वीडेनलाई २-० गोलले र क्रोएसियाले रसियालाई पेनाल्टी सुटआउटमा ४-३ गोलले पराजित गर्दै सेमिफाइनल पुगेका हुन् । उपाधि दौडमा रहेका बेल्जियम, फ्रान्स, इङल्यान्ड र क्रोएसियामध्ये कुन राष्ट्रले २१औं संस्करणको विश्वकपको उपाधि उचाल्ला ? निकै रोचक बन्दै गएको छ ।

विश्वकप जितेका दुई राष्ट्र

जारी विश्वकपको सेमिफाइनलमा पुर्वविश्वकप जितेका दुई राष्ट्र मात्रै पुगेका छन् । यी दुबै राष्ट्रले आफ्नै माटोमा आयोजना भएको विश्वकपको उपाधि उचालेका थिए । फ्रान्सले सन् १९९८ मा आफैँले आयोजना गरेको विश्वकप फुटबलको उपाधि फाइनलमा ब्राजिललाई ३-० गोलले पराजित गर्दै उचालेको थियो । 

त्यस्तै इङल्याण्डले सन् १९६६ मा आफैँले आयोजना गरेको विश्वकप फुटबलको उपाधि उचालेको थियो । विश्वकपको फाइनल खेलमा इङल्यान्डले जर्मनीलाई ४-२ गोलअन्तरले पराजित गर्दै पहिलो पटक विश्वकपको उपाधि चुमेको थियो । त्यपछि यी दुबै टोलीले अहिलेसम्म विश्वकपको उपाधि उचालेका छैनन् । 

उपाधि दौडमा दुई नयाँ राष्ट्र

यो पटकको विश्वकपको उपाधि दौडमा दुई नयाँ राष्ट्र रहेका छन् । बेल्जियम र क्रोएसियाले अहिलेसम्म विश्वकप फुटबलको उपाधि जितेका छैनन् । त्यसो त, यी दुई टिम अहिलेसम्म फाइनलमा पुगेका छैनन् । बेल्जियम जारी विश्वकप फुटबलमा दमदार प्रदर्शन गर्दै क्वाटरफाइनल सम्मको यात्रामा ठूला राष्ट्रलाई पराजित गरेको छ । 

क्वाटरफाइनलमा बेल्जियमले बलियो टिम ब्राजिललाई २-१ गोलअन्तरले पराजित गरेको हो । त्यसैले यो पटक बेल्जियम इतिहास रच्ने दाउँमा छ ।
त्यस्तै, क्रोएसियाले पनि शानदार प्रदर्शन गर्दै २० वर्षपछि विश्वकप फुटबलको सेमिफाइनलमा पुगेको हो । यसअघि सन् १९९८ मा क्रोएसिया विश्वकपको सेमिफाइनलमा पुगेको थियो ।