बिहेमा बाजा बजाउन गएका रामबहादुर सात दिनदेखि बेपत्ता

काठमाडौं-  रामेछापको लिखुतामाकोशी गाउँपालिका–४ बाट ७१ वर्षीय साने भनिने रामबहादुर दमाई सात दिनदेखि बेपत्ता छन्। 

साने यही मंसिर १३ गते गाउँकै बिहे समारोहमा बाजा बजाएर फर्किने क्रममा बीच बाटोबाटै बेपत्ता भएका थिए। उनीसँगै गएका ठूलाकान्छा भनिने बीरे दमाईले आफू शौचालय गएर फर्किँदा उनी नभटिएको बताएका छन्। 

उनले भने, 'मलाई  शौच आएपछि सानेलाई बाटोमै छोडेर शौचालय छिरेका थिएँ। पछि फर्किँदा साने देखिएनन्। साँझ परिसकेको हुनाले घर गयो होला भन्ठानेर म पनि घरतिर लागेँ।'

तर बाटोबाटै बेपत्ता भएका साने सात दिनसम्म पनि फर्किएनन्। साने घर नआएपछि उनका परिवार र छिमेकीले खोजी गरे पनि हालसम्म भेटिएका छैनन्। खोजीका लागि स्थानीय प्रशासन र जनप्रतिनिहरुलाई गुहारे पनि बेवास्ता गरेको परिवारको आरोप छ। 

स्थानीय दीपक सुन्दासले साने बेपत्ता भएको ठाउँ वरपर मात्र प्रहरीले सामान्य खोजतलास गरेको बताए। लिखुतामाकोशी गाउँपालिकाका अध्यक्ष गोविन्द बहादुर खड्कालगायत स्थानीय जनप्रतिनिधिहरुलाई घटनाबारे जानकारी गराइएको भए पनि खोजीका लागि कुनै पहल नभएको परिवारको गुनासो छ।

खोजी कार्यमा स्थानीय जनप्रतिनिधि, प्रहरी प्रशासन, पत्रकार, युवा र स्थानीय अगुवालाई सहयोग गर्न सुन्दासले अनुरोध गरेका छन्।