कार्कीको २२५ किलोमिटर दौड सोमबारबाट सुरु हुने

काठमाडौं- लामो दूरीका धावक रामसुन्दर कार्कीले ललितपुरको गोदावरी नगरपालिका गोदामचौर, कार्कीटार, हनुमान मन्दिरदेखि जनकपुरको रामजानकी मन्दिरसम्म दौडने भएका छन्।

गोदामचौरस्थित आफैले निर्माण गरेको हनुमान मन्दिरबाट २ सय २५ किलोमिटर दूरीको दौड यात्रा कार्कीले सोमबारदेखि थाल्ने भएका छन्। मंसिर २० गतेदेखि सुरु हुने छ।

पहिलो दिनको दौड नेपालथोकमा पुगेर टुंगिने छ। दोस्रो दिनको दौड यात्रा कमलामाई नगरपालिकासम्म हुने छ भने तेस्रो तथा अन्तिम दिन जनकपुरको रामजानकी मन्दिरमा पुगेपछि दौड सम्पन्न हुने छ। दौड एकतर्फी मात्र हुने छ। कार्की तेस्रोपटक गोदामचौरदेखि जनकपुरसम्म दौडन लागेका हुन्।

कार्कीले विगतमा दौडको माध्यमबाट संकलन भएको रकम विभिन्न सामाजिक कार्य सहयोग गरेको बताउँदै यसपटकको दौडको उद्देश्य आफैले निर्माण गरेको हनुमान मन्दिरमा २७ फिट अग्लो गर्दा निर्माणका लागि आर्थिक सहयोग जुटाउनु रहेको बताए।

यसअघि कार्की दौडेर नेपालको ७५ वटै जिल्ला पुगिसकेको छन्। त्यस्तै काठमाडौं–लुम्बिनी ६ पटक, काठमाडौं–दोलखा ३ पटक, काठमाडौं सिन्धुली ३ पटक र काठमाडौं–पोखरा १ पटक दौडिसकेको कार्कीले जानकारी गराए। साथै काठमाडौंदेखि मित्रराष्ट्र भारतको उत्तरप्रदेशको विहार राज्य तथा भुटानको फुन्सुलिङसम्म दौडिसकेका कार्कीले विभिन्न घरेलु प्रतियोगितामानसमेत प्रतिस्पर्धा गरेका छन्।