प्रधानमन्त्रीको घोषणा : यो वर्ष तुईन हट्छ

काठमाडौं- प्रधानमन्त्री केपी शर्मा ओलीले यसै वर्षभित्र तुईन हटाउने घोषणा गरेका छन् । नेपाल उद्योग परिसंघले १५ औं वार्षिक साधारणसभाको अवसरमा आयोजना गरेको कार्यक्रममा प्रधानमन्त्री ओलीले ०७५ साल भित्र देशका सबै तुईन विस्थापित हुने बताए । 

‘तुईन एराको अन्त भनेको तुईन बन्द गर्नु मात्रै होइन, पछ्यौटेपनको अन्त्य पनि हो,’ उनले कार्यक्रममा भने ‘ज्यान खतरामा राखेर स्कुल जाने बालबालिकाको मनोबल उच्च पार्नु पनि हो । जीविकाका लागि पारी तर्छु कि खोलामा खस्छु भन्ने टुगों नहुने युगको अन्त्य हो ।’ 

तुईन विस्थापन फलामको डोरी विस्थापन गर्नुमात्रै नभएको उनको भनाइ छ । उनले भने, ‘मैले अहिले ९५ वटा तुईन विस्थापन गरिसकेको छु । अब करिब ५० वटा तुईन विस्थापन हुने तयारीमा छ ।’ उनका अनुसार महाकालीमा भएका तुईन हटाउन भारतसँग सहमती भएको छ ।