विश्वकप : आत्मघाती गोलकै कारण हत्या

काठमाडौं-फिफा विश्वकप १९३० देखि २०१४ सम्म विश्वकपमा जम्मा २ हजार ३ सय गोल भएका छन् । जसमा ४१ वटा आत्मघाती गोल भएको तथ्यांक छ । फुटबल मैदानमा यस्तो घटना बिरलै हुन्छ । तर, जारी विश्वकपमा क्वाटरफाइनलका दुई खेल सकिँदा सम्म एक सय ५१ गोल हुदा ११ आत्मघाती गोल भएका छन् । 

रुसका खेलाडीले दुई आत्मघाती गोल गर्दा अष्ट्रलिया, मोरक्को, ब्राजिल, नाईजेरिया, स्विट्जरल्याण्ड, इजिप्ट, पोल्याण्ड, ट्युनिसिया र मेक्सिकोका खेलाडीले एक एक आत्मघाती गोल गरेका छन् ।

पछिल्लो ब्राजिल र बेल्जियमबीचको क्वाटरफाइनल खेलमा ब्राजिलका फर्नान्डिनोले गरेको आत्मघाती गोल नै ब्राजिलको हारको कारण बन्यो । ब्राजिलले बेल्जियमसँग २-१ ले पराजित भएको थियो।

१९९४ को विश्वकपका दौरान कोलम्बियाका मिडफिल्डर आन्द्रे एस्कोबारले अमेरिकी टोलीबीचको खेलमा आत्मघाती गोल गरेका थिए । सोहि आत्मघाती गोलका कारण कोलम्बियाले २-१ ले पराजित भएको थियो। यसको एक हप्ता पछि उनलाई आत्मघाती गोलकै कारण गोली हानी हत्या गरिएको थियो । 

आजसम्म आयोजित विश्वकप मध्ये १९३४, १९५८, १९६२ र १९९० को विश्वकपमा मात्र आत्मघाती गोल भएको छैन् । फ्रान्समा भएको विश्वकप १९९८ मा यसअघिको सबैभन्दा बढी आत्मघाती गोल भएको मानिन्छ । त्यो बेला ६ आत्मघाती गोल भएको थियो । तर, यसपालीको विश्वकपमा भने अझै ६ खेल बाँकी रहदा सम्म ११ आत्मघाती गोल भैसकेका छन् । यो नै २१ औं संस्करणको विश्वकप सम्मको सबैभन्दा धेरै आत्मघाती गोल संख्या हो ।

२०१४ को विश्वकपमा पनि पाँच आत्मघाती गोल भएका थिए । यस मध्ये दुई गोल फ्रान्सका दुई अलग अलग खेलमा होन्डुरस र नाइजेरियाले गरेका थिए । तर, हाल सम्मको विश्वकप यात्रामा आत्मघाती गोल नगर्ने राष्ट्र फ्रान्स मात्र हो ।